दिल्ली दंगल २०२० आणि प्रक्षोभक भाषण केल्याच्या आरोपाखाली तुरुंगात असलेल्या शरजील इमामला दिल्ली न्यायालयाने मोठा दिलासा दिला आहे. न्यायालयाने त्याला १० दिवसांचा अंतरिम जामीन मंजूर केला आहे.
शरजील इमामने आपल्या बहिणीच्या लग्नासाठी न्यायालयात अंतरिम जामिनाचा अर्ज दाखल केला होता. या अर्जावर सुनावणी करताना न्यायालयाने मानवतावादी दृष्टिकोनातून त्याला ही सवलत दिली आहे. या १० दिवसांच्या कालावधीत शरजीलला त्याच्या कुटुंबीयांसोबत लग्नासोहळ्यात सहभागी होता येणार आहे. मात्र जामिनाची मुदत संपल्यानंतर त्याला पुन्हा तुरुंग प्रशासनासमोर हजर व्हावे लागणार आहे.
न्यायालयाने जामीन मंजूर करताना काही कडक अटीही घातल्या आहेत. अंतरिम जामिनाच्या काळात तो कोणत्याही प्रकारचे प्रक्षोभक विधान करणार नाही किंवा पुराव्यांशी छेडछाड करणार नाही, याची खबरदारी घेण्याचे निर्देश देण्यात आले आहेत.
