पंतप्रधान नरेंद्र मोदी यांच्याशी फोनवर चर्चा केल्यानंतर अवघ्या 12 तासांतच अमेरिकेचे राष्ट्राध्यक्ष डोनाल्ड ट्रम्प यांनी पुन्हा एकदा हिंदुस्थान-पाकिस्तान युद्ध मीच थांबवल्याचा दावा केला. युद्ध थांबवण्यासाठी मोदी सकारात्मक होते. त्यामुळे गोष्टी सोप्या झाल्या, असे नमूद करताना दोन्ही देशांमध्ये व्यापार करार घडवून आणणार, असे ट्रम्प म्हणाले.
मोदींशी काल रात्री माझं बोलणं झाले. आम्ही मोदींशी व्यापार करार करत आहोत, असे सांगतानाच मला पाकिस्तान हा देश आवडतो, असे ट्रम्प म्हणाले. त्यांनी पाकिस्तानचे सैन्यप्रमुख असीम मुनीर यांचे काैतुक केले. युद्ध थांबण्यासाठी हिंदुस्थानकडून मोदी व त्यांचे सहकारी तर पाकिस्तानकडून मुनीर यांचे मोठे सहकार्य मिळाले, असे ट्रम्प म्हणाले.
मोदींची ट्रम्प यांच्याशी 35 मिनिटे चर्चा
नरेंद्र मोदी आणि ट्रम्प यांच्यात फोनवरून 35 मिनिटे चर्चा झाली. यात मोदींनी ट्रम्प यांना ऑपरेशन सिंदूरबाबत माहिती दिली. पाकिस्तानच्या विनंतीवरूनच शस्त्रसंधी झाली. यात तिस्रया देशाची मध्यस्थी नव्हती आणि यापुढेही अशी मध्यस्थी आम्ही मान्य करणार नाही, असे या चर्चेत मोदींनी नमूद केल्याची माहिती परराष्ट्र सचिव विक्रम मिसरी यांनी दिली.
