आजकाल वजन कमी करण्यासाठी आणि विशेषतः पोटावरील चरबी (बेली फॅट) घटवण्यासाठी अनेक घरगुती उपाय केले जातात. त्यापैकी कोमट पाण्यात लिंबाचा रस मिसळून पिणे हा सर्वाधिक लोकप्रिय उपाय आहे. मात्र, हा उपाय खरोखरच पोटावरील चरबी कमी करतो का? आहारतज्ज्ञांच्या मते, कोमट पाण्यात लिंबाचा रस घालून पिल्याने थेट पोटावरील चरबी कमी होते, असा कोणताही वैज्ञानिक पुरावा उपलब्ध नाही. लिंबामध्ये चरबी जाळण्याचा (फॅट बर्निंग) असा कोणताही विशेष गुणधर्म नसतो, जो फक्त पोटाभोवतीची चरबी कमी करू शकेल. याचा अर्थ लिंबूपाणी निरुपयोगी आहे, असे मात्र नाही. जर तुम्ही साखरयुक्त शीतपेये, गोड चहा किंवा इतर जास्त कॅलरी असलेल्या पेयांऐवजी लिंबूपाणी पित असाल, तर तुमच्या दैनंदिन कॅलरीचे प्रमाण कमी होऊ शकते. परिणामी, दीर्घकाळात वजन कमी होण्यास मदत मिळू शकते.
याशिवाय, शरीरात पुरेसे पाणी राहिल्याने पोट भरल्याची भावना अधिक काळ टिकते. त्यामुळे वारंवार भूक लागणे किंवा सतत काहीतरी खाण्याची इच्छा कमी होऊ शकते. मात्र, हे वजन कमी होण्याचे कारण लिंबू नसून कमी कॅलरी आणि योग्य हायड्रेशन असते. एका लिंबामध्ये साधारण 30 ते 40 मिलीग्रॅम व्हिटॅमिन C असते. त्यामुळे शरीराची दैनंदिन व्हिटॅमिन C ची गरज काही प्रमाणात पूर्ण होण्यास मदत होते. रोगप्रतिकारशक्ती वाढवण्यासाठी आणि त्वचेच्या आरोग्यासाठीही व्हिटॅमिन C महत्त्वाचे मानले जाते. त्यामुळे लिंबूपाणी हा आहारात व्हिटॅमिन C समाविष्ट करण्याचा सोपा मार्ग ठरू शकतो.
तज्ज्ञांच्या मते, शरीरातील चरबी एका विशिष्ट भागातून कमी होत नाही. वजन कमी होताना संपूर्ण शरीरातील चरबी कमी होते. त्यामुळे केवळ एखादे पेय किंवा घरगुती उपाय करून पोटावरील चरबी कमी होईल, अशी अपेक्षा ठेवू नये.
संतुलित आणि पौष्टिक आहार
नियमित व्यायाम व शारीरिक हालचाल
पुरेशी झोप
साखर आणि प्रक्रिया केलेले पदार्थ कमी खाणे
दीर्घकाळ टिकणाऱ्या आरोग्यदायी सवयी अंगीकारणे
