दक्षिण हिंदुस्थानातील प्रसिद्ध तीर्थक्षेत्र असलेल्या तेलंगणा राज्यातील निर्मल जिल्ह्यातील बासर येथील गोदावरी नदीच्या पात्रात पोहण्यासाठी गेलेल्या पाच भाविकांचा बुडून मृत्यू झाल्याची दुर्दैवी घटना आज रविवारी दुपारी 1 वाजता घडली.
तेलंगणा राज्यातील हैदराबाद येथील चिंतल बाजार येथील 18 भाविक दक्षिण हिंदुस्थानात प्रसिद्ध असलेल्या लेल्या बासर येथे श्री सरस्वती मातेचे दर्शन घेऊन गोदावरी नदीत पोहण्यासाठी गेले. मात्र पाण्याच्या खोलीचा अंदाज न आल्याने राकेश (17), विनोद (18), मदन (18), ऋतिक (17) व भरत (18) या पाच भाविकांचा पाण्यात बुडून मृत्यू झाला. घटनेची माहिती मिळताच बासर पोलीस ठाण्याचे पोलीस निरीक्षक अविनाश कुमार, सर्कल इन्स्पेक्टर किरण रेड्डी, पोलीस अधिकारी गणेश, पोलीस अधिकारी जी. गंगासागर आदींनी घटनास्थळी धाव घेतली आणि स्थानिक मच्छीमारांच्या सहाय्याने पाचही मृतदेह नदीपात्रातून बाहेर काढून पंचनामा केला व शवविच्छेदनासाठी स्थानिक रुग्णालयात पाठवून दिले.
बासर येथील गोदावरी नदीपात्रात एका बोटीच्या सहाय्याने 18 भाविक नदीपात्रात गेले होते. नदीपात्रात मध्यभागी गेल्यानंतर त्या ठिकाणी बोटीतील पाच भाविक पोहण्यासाठी नदीपात्रात उतरले. मात्र पोहताना पाण्याच्या खोलीचा अंदाज न आल्याने त्यांचा बुडून मृत्यू झाला.
पोलिसांनी केला होता मज्जाव
दोन महिन्यांपूर्वी पोलिसांनी घटना घडलेले ठिकाण धोकादायक असल्याने तेथे बोट नेऊ नका असे बोटचालकांना बजावले.होते. त्यानंतरही बोट चालकाने धोकादायक ठिकाणी बोट नेल्यामुळे या बोट चालकास ताब्यात घेतल्याची माहिती बासर पोलिसांनी दिले आहे.
