अमेरिकेने टॅरिफचा दणका देताच मोदी सरकारने वस्तू व सेवा करात (जीएसटी) सुधारणांचे पाऊल उचलले आहे. आता कुठल्याही वस्तूवर 5 टक्के आणि 18 टक्के एवढाच जीएसटी लागणार आहे. 12 टक्के व 28 टक्क्यांचा स्लॅब रद्द करण्यात आला आहे. नवे दर 22 सप्टेंबरपासून लागू होणार असून त्यामुळे अनेक वस्तू स्वस्त होणार आहेत. त्याचा फायदा देशांतर्गत उत्पादकांना होणार आहे.
केंद्रीय अर्थमंत्री निर्मला सीतारामन यांच्या अध्यक्षतेखाली आजपासून सुरू झालेल्या जीएसटी परिषदेच्या बैठकीत हा निर्णय घेण्यात आला. ही बैठक उद्यापर्यंत चालणार आहे. पहिल्या दिवशी जीएसटीचे केवळ 2 स्लॅब ठेवण्याचा प्रस्ताव मंजूर करण्यात आला. जीएसटी करांमध्ये बदल करण्याची व जनतेला दिलासा देण्याची मागणी दीर्घकाळापासून होत होती. मात्र त्यावर निर्णय होत नव्हता. तो अखेर झाला आहे.
काय स्वस्त होणार?
28 टक्क्यांवरून 18 टक्के
सिमेंट, छोटय़ा कार, ऑटो पार्टस्, तीनचाकी गाडय़ा, एसी, टीव्ही, डिश, वॉशिंग मशिन्स, 300 सीसीपर्यंतच्या मोटरसायकल, बस, ट्रक, ऍम्बुलन्स.
5 टक्क्यांवरून शून्य टक्के
दूध, पनीर, स्वदेशी ब्रेड.
18 व 12 वरून 5 टक्के
नमकीन्स, भुजिया, सॉस, पास्ता, इन्स्टंट नूडल्स, चॉकलेट, कॉफी, बटर, तूप, मांस, केश तेल, टॉयलेट सोप्स, बार, शॅम्पू, टूथपेस्ट, स्वयंपाकघरातील वस्तू, सायकल, वैद्यकीय उपकरणे, कृषी साहित्य.
जीवन विमा जीएसटी मुक्त
टर्म लाइफ इन्शुरन्स, युलिप, एन्डोमेंट असा सर्व प्रकारचा वैयक्तिक जीवन विम्याला जीएसटी करातून वगळण्यात आले आहे. त्यामुळे व्यक्तिगत विमा आता स्वस्त होणार आहे.
40 टक्के स्पेशल जीएसटी
जीएसटीचे दोन स्लॅब रद्द करताना जीएसटीची परिषदेने 40 टक्क्यांचा विशेष कर लागू केला आहे. हा कर पानमसाला, तंबाखूजन्य पदार्थ, सिगारेट व विशिष्ट प्रकारच्या पेयांवर लागेल.
