गुंतवणूक केलेल्या पैशांचा मोठा परतावा मिळवून देण्याचे आमिष दाखवून शिर्डीसह परिसरातील 21 जणांची फसवणूक केल्याची घटना शिर्डी पोलीस स्टेशन परिसरात घडली आहे. याप्रकरणी अनिल रामकृष्ण आहेर (वय 45, रा. शिर्डी) यांनी फिर्याद दिली आहे.
शिर्डी येथील एका हॉटेलमध्ये ग्रो-मोर इनव्हेस्टमेंट्सच्या वतीने संस्थांमधील गुंतवणुकीची, परताव्याची माहिती देऊन कंपनी नोंदणीकृत आहे, असे सांगून विश्वास संपादन केला. यानंतर मी माझी पत्नी व भाऊ मिळून 18 लाख 81 हजार रुपयांची गुंतवणूक केली. आम्हाला चार लाख 94 हजार रुपयांचा एकच परतावा दिला. त्यानंतर परतावा न देता पैसे देण्यास टाळाटाळ केली. फसवणूक झाल्याचे अनिल आहेर यांच्या लक्षात आल्यानंतर त्यांनी पोलीस ठाण्यात धाव घेत फिर्याद दिली.
भूपेंद्र राजाराम सावळे, राजाराम भटू सावळे (दोघे रा. एअरपोर्टरोड शिर्डी), पूजा गोकुळ पोटींडे (रा. रमैया सोसायटी, दिंडोरी रोड, नाशिक), सुबोध सुकदेव पाटील उर्फ सावळे (रा. नांदुर्खी रोड, शिर्डी), संदीप भास्कर सावळे (रा. नांदुर्खी रोड, शिर्डी), भाऊसाहेब आनंदराव थोरात (रा. जुना बिरोबा रोड, शिर्डी), अरुण रामदास नंदन (रा. वृंदावन कॉलनी, नाशिक) या सात जणांविरोधात आहेर यांनी शिर्डी पोलिसांत तक्रार नोंदवली.
फसवणूक झाल्यामध्ये अनिल रामकृष्ण आहेर (फिर्यादी) (11 लाख 11 हजार), दीपाली अनिल आहेर (3 लाख), नानासाहेब रामकृष्ण आहेर (5 लाख), राहुल डांगे (8 लाख), महेश डांगे (3 लाख), सीताराम डांगे (5 लाख), बाबासाहेब डांगे (10 लाख), विजय गुंजाळ (10 लाख), शरद शेळके (5 लाख), ज्योती राऊत (3 लाख), सुभाष लोखंडे (4 लाख), सोमेश्वर आगलावे (19 लाख 58 हजार), मीना नामदेव निकम (2 लाख), दीपक शिवाजी तुरकरणे (7 लाख), योगीता वाल्मीक धरम (30 लाख), ज्योती विनोद धनावडे (6 लाख), विनोद श्रीरंग धनावडे (5 लाख), सुरेश दौलत धारे (3 लाख), चंद्रकांत पांडुरंग जाधव (9 लाख), प्रसाद चंद्रकांत जाधव (6 लाख), अर्चना चंद्रकांत जाधव (10 लाख) अशी एकूण एक कोटी 65 लाखांची गुंतवणूक केली आहे. या प्रत्येकाला फक्त पहिलाच परतावा मिळाला असल्याचे आहेर यांनी तक्रारीत म्हटले आहे.
