![Untitled design(11)](https://www.saamana.com/wp-content/uploads/2024/05/Untitled-design11-1-696x447.jpg)
अतिरिक्त एमआयडीसी मध्ये असलेल्या एका गोदामात अवैधरित्या बनावट गुटख्याचा कारखाना चालवण्यात येत असल्याची पोलिसांना गुप्त माहिती मिळाली होती. मंगळवारी पोलिसांनी धाड टाकून पोलिसांनी 3 कोटी रुपयांचा मुद्देमाल जप्त केला आहे.
सहाय्यक पोलीस अधीक्षक बी. चंद्रकांत रेड्डी यांच्या पथकाला अतिरिक्त एमआयडीसी लातूर येथे अवैधरित्या बनावट गुटखा बनविण्याचा कारखाना चालू असल्याची माहिती मिळाली. याची खात्री करून सहाय्यक जिल्हा पोलीस अधीक्षक बी. चंद्रकांत रेड्डी यांच्या मार्गदर्शना खालील पोलीस पथकाने दिनांक 28 मे रोजी लातूर येथील अतिरिक्त एमआयडीसी मधील कोंबडे अॅग्रो एजन्सी या वेअर हाऊसवर छापा टाकला. छाप्यामध्ये बनावट गुटखा तयार करण्यासाठी वापरण्यात येणारा कच्चा माल सुपारी, तंबाखू पावडर, मिक्सर, सिलिंग करणार्या मशीन, गोवा 1000 असे छापील पॅकिंग साहित्य, बनावट गुटखा, एक ट्रक व एक पिकअप असा एकूण 03,05,73,400 रुपये किंमतीचा मुद्देमाल मिळून आला. हा मुद्देमाल पंचासमक्ष जप्त करण्यात आला आहे.
या प्रकरणी अंकुश रामकिशन कदम (32) रा. रामवाडी ता. चाकूर, हसनकुमार तिलाही उराम (21) रा. शाहबगंज (राज्य बिहार), गोकुळ धनराम मेघवाल रा. चुवा (राज्य राजस्थान), धनंजय गहिनीनाथ कोंबडे रा. लातूर, पारस बालचंद पोखरणा रा. लातूर, राम केंद्रे रा. लातूर व विजय केंद्रे रा. लातूर यांच्याविरूध्द एमआयडीसी पोलीस ठाण्यात गुन्हा दाखल करण्यात आला असून, पुढील तपास चालू आहे. ही कारवाई सहाय्यक पोलीस अधीक्षक बी. चंद्रकांत रेड्डी, पोलीस उपनिरीक्षक होनाजी चिरमाडे, पोलीस उपनिरीक्षक राजेश घाडगे, हेड कॉन्स्टेबल विष्णू गुंडरे, पोलीस नाईक अनंतवाड, पोलीस कॉन्स्टेबल कांबळे, धडे, गाडेकर, शिंदे, पेद्देवाड, रायबोळे यांनी महत्वपूर्ण कामगिरी बजाविली.