लाल चंदन पावडर त्वचेसाठी लाभदायक असते. त्वचा उजळण्यासाठीही तुम्ही लाल चंदनाचा फेस पॅक तयार करून लावू शकता. यामुळे चेहऱ्यावरीवर मुरुम आणि मुरुमांचे डाग कमी होतील. आपल्या घरामध्ये पूजा करताना लाल चंदनाचा वापर केला जातो. आयुर्वेदिक उपचारांमध्ये लाल चंदनास अतिशय महत्त्व आहे. पारंपरिक स्वरुपातील औषधांमध्ये लाल चंदनाचा वापर केला जातो. कपाळावर टिळा लावण्याव्यतिरिक्त सौंदर्य प्रसाधनांमध्येही लाल चंदन मोठ्या प्रमाणात वापरतात. यातील औषधी गुणधर्मांमुळे त्वचेवरील पिगमेंटेशन आणि मुरुम यांसारख्या समस्या कमी होण्यास मदत मिळते. त्वचेची काळजी घेण्यासाठी बऱ्याच जणींना वेळ मिळत नसल्याने ब्युटी पार्लर ट्रीटमेंटची मदत घेतली जाते. पण यातील बहुतांश प्रोडक्टमध्ये हानिकारक केमिकल असते. या ट्रीटमेंटमुळे त्वचेला तात्पुरतेच लाभ मिळतात. चेहऱ्याचं नुकसान टाळण्यासाठी आणि दीर्घ काळाचे लाभ मिळवण्यासाठी स्किन केअर रुटीनमध्ये लाल चंदनाचा समावेश करून पाहा. काही दिवसांतच तुम्हाला चेहऱ्यामध्ये आश्चर्यकारक बदल जाणवतील.
मुरुम कमी करण्यासाठी
चेहऱ्यावरील मुरुम कमी करण्यासाठी लाल चंदन एक प्रभावी उपाय म्हणून ओळखलं जाते. मुरुमांची समस्या दूर करण्यासाठी लाल चंदनाच्या फेस पॅकचा तुम्ही वापर करू शकता. यासाठी चंदन आणि कडुलिंबाच्या पाल्याची पावडर समान मात्रेत घ्या. यामध्ये एक चमचा दही मिक्स करा. हा लेप चेहरा आणि मानेवर १५ मिनिटांसाठी लावून ठेवा. यानंतर थंड पाण्याने तोंड धुऊन घ्या. या फेस पॅकमुळे मुरुमांची समस्या नियंत्रणात येण्यास मदत मिळेल. याव्यतिरिक्त अर्धा ग्रॅम लाल चंदन पावडरमध्ये पाणी आणि मध मिक्स करून चेहऱ्यावर लावा. हा उपाय देखील लाभदायक आहे.
चेहऱ्यावरील पिगमेंटेशन
सौंदर्य प्रसाधनांच्या उद्योगामध्ये लाल चंदनाचा मोठ्या प्रमाणात वापर केला जातो, हे तुम्हाला माहिती आहे का? कारण यातील औषधी घटक चेहऱ्यावरील पिगमेंटेशनचे निशाण कमी करण्यासाठी मदत करतात. बाजारातील केमिकलयुक्त उत्पादनांऐवजी घरामध्ये लाल चंदनाचा लेप तयार करून त्वचेसाठी वापरावा. चंदन पावडरमध्ये बदाम तेलाचे काही थेंब मिक्स करा आणि या मिश्रणाची जाडसर पेस्ट तयार करून घ्या. यामध्ये तुम्ही ओल्या नारळाचे दूध देखील मिक्स करू शकता. चेहऱ्यावरील पिगमेंटेशन दूर करण्यासाठी चंदनाचा लेप लावणं हा एक रामबाण उपाय आहे. चंदन लेपचा नियमित वापर करून चेहऱ्यावरील डाग कमी होण्यास मदत मिळते. चंदन पावडरसह थोडेसे कच्चे दूध मिक्स करा आणि लेप चेहऱ्यावर लावा. या नैसर्गिक उपचारामुळे चेहऱ्याला नक्कीच भरपूर फायदे मिळतील.
एक्झिमा
एक्झिमा हा एक त्वचा रोग आहे. ज्यामध्ये त्वचा कोरडी होते. त्वचेशी संबंधित ही समस्या दूर करण्यासाठी हर्बल, नैसर्गिक उपचार पद्धती तुम्ही अवलंबू शकता. एक्झिमामुळे त्वचेला सूज येणे आणि खाज सुटण्याची त्रास उद्भवतो. यापासून सुटका मिळवण्यासाठी तुम्ही चंदन पावडर आणि कापूर एकत्र घ्या. यापासून पेस्ट तयार करा. त्यात काही प्रमाणात पाणी देखील मिक्स करा. या लेपमुळे त्वचेला खाज सुटणे आणि जळजळ होण्याची समस्या कमी होण्यास मदत मिळेल.
त्वचेची जळजळ कमी करण्यासाठी
चंदन लेपमुळे त्वचेला थंडावा मिळतो. त्वचेला होणारी जळजळ कमी करण्यासाठी चंदन फार पूर्वीपासून वापरले जात आहे. त्वचेवर होणारा दाह आणि जळजळ या समस्यांपासून सुटका मिळवण्यासाठी मंजिष्ठा व तूप समान मात्रेत घ्यावे. यामध्ये आता एक चमचा लाल चंदन पावडर मिक्स करावी. ज्या ठिकाणी जळजळ होण्याचा त्रास होतोय, तेथे चंदन लेप लावा. लाल चंदनमध्ये अँटी सेप्टिक गुणधर्म भरपूर प्रमाणात आहेत.
