शिरोळ/जयसिंगपूर तालुक्यातील नांदणी येथील ‘महादेवी’ ऊर्फ ‘माधुरी’ हत्तिणीला वनतारा हत्ती संवर्धन केंद्रात हलविण्यात आले आहे. सर्वोच्च न्यायालयाचा आदेश आल्यानंतर सोमवारी (28 रोजी) रात्री हत्तिणीला निरोप देण्यात आला. यावेळी नांदणीकर भावनिक झाले होते. नांदणी मठाचे भट्टारक जिनसेन महास्वामीजी यांनी स्वतः हत्तिणीला हार अर्पण केला. हार घालतानाच त्यांना अश्रू अनावर झाले होते. हे दृश्य पाहून ‘महादेवी’ हत्तिणीच्याही डोळ्यांतून अश्रू वाहू लागले होते.
दरम्यान, नांदणी मठाच्या ‘महादेवी’ हत्तिणीला निरोप देताना झालेल्या दगडफेकप्रकरणी 125हून अधिक जणांवर गुन्हा दाखल झाला आहे. तोडफोड करणाऱ्या 39 जणांची नावे निष्पन्न झाली असून, 100 ते 125 अज्ञातांवरदेखील गुन्हा दाखल करण्यात आला. नांदणीमध्ये झालेल्या तोडफोडीमध्ये 12 पोलीस जखमी झाले आहेत. राजू शेट्टी यांचे स्वीय सहायक स्वस्तिक पाटील आणि सहकारी सागर शंभुशेटे यांच्यावरदेखील गुन्हा दाखल करण्यात आला असून, पोलिसांच्या सात गाडय़ांची जमावाने तोडफोड केली.
दरम्यान, ‘महादेवी’ हत्तीण मागील 40 वर्षांपासून नांदणी मठाशी आणि गावाशी जोडलेली होती. धार्मिक मिरवणूक, उत्सव आणि विविध सामाजिक उपक्रमांमध्ये तिचा सहभाग होता. स्थानिक श्रावक-श्राविका, ग्रामस्थ आणि जैन बांधव हत्तिणीला निरोप देण्यासाठी मोठय़ा संख्येने जमले होते. अनेक महिलांना अश्रू अनावर झाले.
