लंडनच्या टॅविस्टॉक स्क्वेअरवरील महात्मा गांधींच्या पुतळ्याची तोडफोड करण्यात आली. (२९ सप्टेंबर) ही घटना घडली असून, (२ ऑक्टोबर) होणाऱ्या वार्षिक गांधी जयंती समारंभाच्या काही दिवस आधी घडली. प्रतिष्ठित पुतळ्याच्या पायथ्याशी प्रक्षोभक भित्तिचित्रे आढळली. या घटनेनंतर, हिंदुस्थानी उच्चायुक्तालयाने या घटनेचा तीव्र निषेध केला.
हिंदुस्थानी दूतावासाने सांगितले की, स्थानिक अधिकाऱ्यांना या घटनेची माहिती देण्यात आली आहे. उच्चायुक्त अधिकारी स्मारकाची दुरुस्ती करण्यासाठी घटनास्थळी पोहोचले आहेत. लंडनमधील हिंदुस्थानी उच्चायुक्तालयाने सोशल मीडियावरील निवेदनात म्हटले आहे की, “टॅविस्टॉक स्क्वेअरवरील महात्मा गांधींच्या पुतळ्याची तोडफोड झाल्याने लंडनमधील हिंदुस्थानी उच्चायुक्तालयाला खूप दुःख झाले आहे.”
मिशनने म्हटले आहे की, “ही केवळ तोडफोडीची घटना नाही तर अहिंसेच्या कल्पनेवर आणि महात्मा गांधींच्या वारशावर हिंसक हल्ला आहे, आंतरराष्ट्रीय अहिंसा दिनाच्या तीन दिवस आधी. आम्ही स्थानिक अधिकाऱ्यांकडे तातडीने कारवाईसाठी हा मुद्दा गांभीर्याने उपस्थित केला आहे. सध्या आमच्याकडून पुतळ्याची दुरुस्ती करण्यासाठी अधिकाऱ्यांशी समन्वय साधत आहे.”
