अजित पवार गटाचे नेते खासदार प्रफुल पटेल यांनी उमेदवारी अर्ज भरण्यापूर्वी पंतप्रधान नरेंद्र मोदी यांना जिरेटोप घातल्याने शिवप्रेमींनी संताप व्यक्त केला होता. या प्रकरणी विरोधकांनी आणि शिवप्रेमींनी प्रफुल पटेलांवर टीका करत तीव्र संताप व्यक्त केला होता. जिरेटोप ही छत्रपती शिवाजी महाराज यांची ओळख असून अनेकांच्या भावना त्याच्याशी जुळल्या आहेत. छत्रपतींच्या प्रतीमेत असणार जिरेटोप प्रफुल पटेल यांनी मोदींच्या डोक्यावर चढवला होता. याचा व्हिडीओ आणि फोटो सोशल मीडियावर व्हायरल झाला होता. त्यानंतर छत्रपती शिवराय यांचा अवमान झाल्याने भावना दुखावल्या गेल्याने पटेल यांच्याविरोधात सर्व स्तरातून संताप व्यक्त करण्यात आला. आता प्रफुल पटेल यांनी यावर सारवासराव करत यापुढे काळजी घेऊ असे म्हटले आहे.
या घटनेबाबत सारवासरव करताना प्रफुल पटेल यांची एक्सवर पोस्ट शेअर केली आहे. त्यात त्यांनी म्हटले आहे की, हिंदवी स्वराज्याचे संस्थापक, युगपुरुष छत्रपती शिवाजी महाराज हे आमचे आराध्य दैवत आणि प्रेरणास्थान आहेत. त्यांच्या आदर्शांवर व लोककल्याणाच्या मार्गावर मार्गक्रमण करण्यासाठी आम्ही कटिबद्ध आहोत. छत्रपती शिवाजी महाराज यांचा अपमान होईल, अशी कोणतीही गोष्ट कधी मनातही येऊ शकत नाही. यापुढे काळजी घेऊ,असे त्यांनी म्हटले आहे.
हिंदवी स्वराज्याचे संस्थापक, युगपुरुष छत्रपती शिवाजी महाराज हे आमचे आराध्य दैवत आणि प्रेरणास्थान आहेत. त्यांच्या आदर्शांवर व लोककल्याणाच्या मार्गावर मार्गक्रमण करण्यासाठी आम्ही कटिबद्ध आहोत. छत्रपती शिवाजी महाराज यांचा अपमान होईल, अशी कोणतीही गोष्ट कधी मनातही येऊ शकत नाही. यापुढे…
— Praful Patel (@praful_patel) May 15, 2024
जिरेटोप हातात देत एखाद्या व्यक्तीचा सन्मान केला जातो. मात्र, प्रफुल पटेल यांनी जिरेटोप पंतप्रधान नरेंद्र मोदी यांच्या डोक्यावर घालत महाराजांचा अवमान केला आहे. महायुती दिल्लीच्या तख्तापुढे इतकी लाचार झाली आहे की, महाराष्ट्राची प्रतिमाच खड्ड्यात घालण्याचे काम हे लोक करत आहेत. महाराजांचा अवमान करणाऱ्या या महायुतीला, भाजपला धडा शिकवल्याशिवाय महाराष्ट्राची स्वाभिमानी जनता शांत बसणार नाही, असे राष्ट्रवादी काँग्रेस शरदचंद्र पवार पक्षाने ट्विट केले आहे.
