उत्तर प्रदेशातील भदोही जिल्ह्यात एक अत्यंत दुर्दैवी घटना घडली आहे. दारू पिण्यासाठी पैसे देण्यास नकार दिल्याने रागाच्या भरात रेल्वे रुळावर आत्महत्या करण्यासाठी गेलेल्या मुलाला वाचवण्याच्या प्रयत्नात एका आईला आपला जीव गमवावा लागला आहे. धावत्या ट्रेनसमोरून मुलाला बाजूला ढकलण्यात आईला यश आले, मात्र या प्रयत्नात ती स्वतः ट्रेनखाली चिरडली गेली. ही धक्कादायक घटना भदोहीच्या कोतवाली हद्दीतील इंदिरा मिल रेल्वे क्रॉसिंगवर गुरुवारी रात्री उशिरा घडली.
मृत महिलेचे नाव शिव कुमारी असून त्या चकभुइंधर गावात राहणाऱ्या होत्या. कोतवालीचे पोलीस निरीक्षक (SHO) शैलेश कुमार राय यांनी दिलेल्या माहितीनुसार, शिव कुमारी या नुकत्याच बाळंत झालेल्या आपल्या मोठ्या मुलीला, पुष्पा राजभर हिला भेटण्यासाठी शहरातील एका खासगी नर्सिंग होममध्ये गेल्या होत्या. यावेळी त्यांचा मुलगा विशालही त्यांच्यासोबत होता. आधीच दारूच्या नशेत असलेल्या विशालने तिथे आईकडे आणखी दारू पिण्यासाठी पैशांची मागणी केली. मात्र, आईने पैसे देण्यास स्पष्ट नकार दिल्याने मायलेकांमध्ये मोठा वाद झाला. हा वाद इतका विकोपाला गेला की, रागाच्या भरात मद्यधुंद विशालने थेट धावत्या ट्रेनसमोर उडी मारून जीवन संपवण्याची धमकी दिली आणि तो नर्सिंग होममधून रेल्वे रुळांच्या दिशेने पळत सुटला.
प्रत्यक्षदर्शींनी दिलेल्या माहितीनुसार, भरधाव ट्रेन जवळ येत असताना विशाल रेल्वे रुळांवर जाऊन उभा राहिला. आपल्या मुलाचा जीव धोक्यात असल्याचे पाहून शिव कुमारी यांनी जीवाच्या आकांताने तिथे धाव घेतली. त्यांनी अत्यंत धैर्याने विशालला रुळांवरून दूर ढकलले, ज्यामुळे त्याचा जीव वाचला, पण दुर्दैवाने त्याच क्षणी ट्रेन आल्याने त्या स्वतः ट्रेनखाली आल्या आणि त्यांचा जागीच मृत्यू झाला. या घटनेत विशाल देखील जखमी झाला असून, सुरुवातीला त्याला उपचारांसाठी जिल्हा रुग्णालयात दाखल करण्यात आले होते. प्रकृती पाहता त्यानंतर पुढील उपचारांसाठी त्याला वाराणसी येथील बीएचयू ट्रॉमा सेंटरमध्ये हलवण्यात आले आहे. घटनेची माहिती मिळताच मृताचे नातेवाईक घटनास्थळी दाखल झाले, मात्र त्यातील अनेकजण दारूच्या नशेत असल्याचे पोलिसांनी सांगितले. अखेर पोलिसांनी त्यांची समजूत काढून त्यांना घरी परत पाठवले.
