त्र्यंबकेश्वर येथे वृत्त संकलनासाठी गेलेल्या पत्रकारांवर शनिवारी प्रवेश शुल्कावरून ठेकेदाराच्या माणसांनी हल्ला केला. तिघांना अमानुष मारहाण केली. गंभीर जखमी झालेले पत्रकार किरण ताजणे यांच्यावर अपोलो रुग्णालयात उपचार सुरू आहेत. या गुंडगिरीचा पत्रकार संघासह सर्व स्तरातून निषेध करण्यात आला आहे.
आगामी सिंहस्थ कुंभमेळ्याच्या पार्श्वभूमीवर साधू-महंतांच्या बैठकीचे वृत्तांकन करण्यासाठी शनिवारी सकाळी नाशिकमधील वृत्तवाहिन्यांचे पत्रकार व कॅमेरामन त्र्यंबकेश्वर येथे गेले होते. तेथील स्वागत कमानीजवळ बाहेरील वाहनांकडून प्रवेश शुल्क आकारले जाते.
पत्रकारांना दिवसात अनेकदा जावे-यावे लागत असल्याने त्यांच्याकडून हे शुल्क घेतले जात नाही. आज वृत्तवाहिन्यांच्या प्रतिनिधींची वाहने अडवून ठेकेदाराच्या लोकांनी जबरदस्तीने वसुली सुरू केली. पत्रकार असल्याची ओळख देताच अर्वाच्य शिवीगाळ केली. योगेश खरे, अभिजीत सोनवणे यांना गाडीतून बाहेर खेचून मारहाण केली.
