सरकार शेतकरी विरोधी असल्याच्या आरोप करत विरोधकांचा चहापानावर बहिष्कार

सामना ऑनलाईन । मुंबई

सोमवारपासुन सुरू होत असलेल्या विधीमंडळाच्या पावसाळी अधिवेशनानिमित्त मुख्यमंत्र्यांनी आयोजित केलेल्या चहापान कार्यक्रमावर विरोधी पक्षांनी बहिष्कार टाकला आहे. राज्य सरकार शेतकरीविरोधी असल्याच्या आरोपासह विविध आरोप करून सरकारचा निषेध करून चहापान कार्यक्रमावर संपूर्ण विरोधी पक्षांनी बहिष्कार टाकल्याची माहिती विधान विधान परिषदेचे विरोधी पक्षनेते धनंजय मुंडे यांनी दिली.

राज्यातील देवेंद्र फडणवीस सरकारमधून भ्रष्टाचार आणि अकार्यक्षमतेमुळे सहा मंत्री वगळण्यात आले आहेत. केवळ सहा मंत्र्यांना वगळून चालणार नाही तर भ्रष्टाचाराचा आरोप असलेल्या दीड डझन मंत्र्यांना मंत्रिमंडळातून काढून टाकायला हवे. तसेच प्रकाश महेतांनी बाराशे कोटी रूपयांच एफएसआय घोटाळा केल्याचा आरोप करत त्यांना केवळ मंत्रिमंडळातून वगळून चालणार नाही, तर त्यांच्यावर गुन्हा दाखल करून कारवाई केली पाहिजे, अशी मागणीही धनंजय मुंडे यांनी केली. राज्यात दुष्काळाची भीषणता लक्षात घेऊन शेतकऱ्यांना पेरणी व पूर्वमशागतीसाठी हेक्टरी 25 हजार रूपये मदत देण्यात यावी, शेतकऱ्यांना सरसकट कर्जमाफी मिळावी, शेतकऱ्यांचे वीज बिल माफ करण्यात यावे. रोजगार निर्माण करण्यात सरकारला अपयश आल्याने बेरोजगार तरुणांना भत्ता दिला पाहिजे, अशी मागणीही धनंजय मुंडे यांनी केली.

विधीमंडळाच्या पावसाळी अधिवेशना पूर्वसंध्येला आयोजित विरोधी पक्षनेत्यांच्या पत्रकार परिषदेत ते बोलत होते. यावेळी राष्ट्रवादी काँग्रेसचे विधीमंडळ पक्षनेते अजित पवार, प्रदेशाध्यक्ष जयंत पाटील, माजी मुख्यमंत्री पृथ्वीराज चव्हाण, काँग्रेस नेते बाळासाहेब थोरात, विजय वड्डेटीवार, नसीम खान, शेकाप नेते गणपतराव देशमुख, समाजवादी पक्षाचे नेते अबु आझमी, राष्ट्रवादीचे हेमंत टकले, भास्कर जाधव, जितेंद्र आव्हाड आदी मान्यवर उपस्थित होते.