तपोवनातील जैवविविधतेच्या रक्षणासाठी जनआंदोलन उभारण्याचा निर्धार नाशिककरांनी केला आहे. आम्हाला कुठलेही पर्यटन केंद्र नको, तपोवनातील वृक्षराजी कायम राहिली पाहिजे, यासाठी प्रसंगी न्यायालयात दाद मागू, यावरही एकमत झाले आहे.
कुंभमेळ्यानिमित्त साधुग्राम साकारण्यासाठी महापालिकेने 54 एकरातील सतराशेहून अधिक वृक्ष तोडण्याचे प्रस्तावित केल्याने नाशिककरांनी तीव्र नाराजी व्यक्त केली. याविरोधात जनसुनावणीवेळीही आक्रमक भूमिका घेतली. पर्यावरण, जैवविविधता रक्षणाला प्राधान्य द्या, अन्यथा तीव्र आंदोलने करू असा इशारा दिला. याचाच एक भाग म्हणून हुतात्मा स्मारक येथे विविध संस्था, संघटनांच्या प्रतिनिधींची बैठक पार पडली. यात प्रस्तावित वृक्षतोडीविरोधात व्यापक आंदोलन उभारण्याचा निर्णय झाला. तपोवनात साखळी उपोषणाला सुरुवात केली जाणार आहे. विविध मंडळे, ज्येष्ठ नागरिक संघ यांच्याशी संपर्क साधून पर्यावरण रक्षणासाठी जागृती करणे, शाळा-महाविद्यालयांमध्ये स्वाक्षरी मोहीम घेणे, सेल्फी पॉईंट उभारणे, संपर्क पेंद्र स्थापन करण्यावर एकमत झाले. या बैठकीचे अध्यक्षस्थान शांताराम चव्हाण यांनी भूषवले. प्रास्ताविक निशिकांत पगारे यांनी केले.
पक्षीमित्रांचा गट अभ्यास करणार
पक्षीमित्रांचा गट स्थापन करून तपोवनातील पक्षी, वन्यजीव, जैवविविधता अभ्यासली जाणार आहे. वृक्षतोडीने होणारे पर्यावरणीय बदल, हवामानावर, हवेच्या गुणवत्तेवर होणारे परिणाम महापालिकेच्या निदर्शनास आणून देण्यात येतील.
