शाळेच्या पहिल्या दिवशी 3 लाख विद्यार्थ्यांची उपस्थिती, 35 टक्के शाळा सुरू

बातमी शेअर करा :
सामना फॉलो करा

कोरोनाचा प्रादुर्भाव असतानादेखील नववी, दहावी आणि बारावीच्या विद्यार्थ्यांचे शैक्षणिक नुकसान टाळण्यासाठी सोमवारपासून राज्यातील शाळा सुरू झाल्या. पहिल्याच दिवशी वर्गात 2 लाख 99 हजार 193 विद्यार्थी हजर होते तर 35.3 टक्के शाळा सुरू झाल्या.

कोरोनाच्या प्रादुर्भावामुळे मुंबईतील शाळा सुरू झालेल्या नाहीत पण आतापर्यंत मुंबईतील 7 हजार 715 शिक्षकांची कोरोना चाचणी करण्यात आली असून त्यांपैकी 21 शिक्षकांचे रिपोर्ट पॉझिटीव्ह आले आहेत. राज्यभरात एकूण 1 लाख 41 हजार 720 शिक्षकांची कोरोना चाचणी झाली त्यांपैकी 1 हजार 353 जणांचे रिपोर्ट पॉझिटीव्ह आहेत.

कोरोनामुळे राज्यातील प्रमुख जिल्ह्यातील शाळा 31 डिसेंबरपर्यंत बंद आहेत. तर कोरोना आटोक्यात आलेल्या जिल्ह्यातील काही शाळा आज मार्च महिन्यानंतर विद्यार्थ्यांसाठी पहिल्यांदा उघडल्या. शिक्षण विभागाकडून 35 जिल्ह्यांच्या मिळालेल्या माहितीनुसार 25 हजार 866 शाळांपैकी 9 हजार 127 शाळा आज सुरु झाल्या.

या जिल्ह्यांतील शाळा बंद

मुंबई, पालघर, ठाणे, पुणे शहर, जळगाव, हिंगोली, धुळे, नांदेड, नाशिक, नागपूर, परभणी.

या जिल्ह्यातील शाळा सुरू

अमरावती, गडचिरोली, धाराशीव, सातारा, सोलापूर, अकोला, यवतमाळ, लातूर, जालना, संभाजीनगर, नंदुरबार, बुलढाणा, गोंदीया, चंद्रपूर, भंडारा, रत्नागिरी, सांगली, रायगड, सिंधुदुर्ग, कोल्हापूर, वाशीम, बीड, पुणे ग्रामीण, वर्धा

सोलापूर जिह्यात सर्वाधिक 85 हजार 660 विद्यार्थ्यांची उपस्थिती. जिह्यातील 940 शाळा भरल्या.
वर्धा जिल्ह्यातील केवळ 918 विद्यार्थीच हजर. 50 शाळ्च भरल्या.
44 हजार 313 शिक्षकेतर कर्मचाऱयांची कोरोना चाचणी करण्यात आली त्यांपैकी 290 कर्मचाऱयांची चाचणी पॉझिटीव्ह आली.

राज्यात एकदिवस आड शाळा भरणार आहेत. त्यानुसार पहिल्या दिवशी 50 टक्के विद्यार्थी उपस्थित होते. जे शाळेत येऊ शकणार नाहीत, अशा विद्यार्थ्यांचे ऑनलाइन वर्ग चालू रहाणार आहेत.
– वर्षा गायकवाड,  शालेय शिक्षणमंत्री

जिल्हा         शाळा भरल्या    विद्यार्थी उपस्थिती
रत्नागिरी   204          7017
रायगड   229          6066
सांगली   332        13790
पुणे           215          9431
सिंधुदुर्ग     82          3765
कोल्हापूर   260       15,112
नगर           278          5560
सातारा   713       28,669
संभाजीनगर   534       25,493
अमरावती   520          1209
गडचिरोली   272          2329
धाराशीव   445        11733
अकोला   462          6956
यवतमाळ   645        15421
लातूर           746       16,754
जालना   409         6996
नंदुरबार   250         3078
बुलढाणा   423         6438
गोंदीया   209         9496
चंद्रपूर           358         8573
बीड           236         2628
वाशीम   119         2916