कणकवली नगरपंचायत सार्वत्रिक निवडणूक 2025 थेट नगराध्यक्ष व 17 नगरसेवक पदासाठी 2 डिसेंबर रोजी सकाळी 7.30 ते सायंकाळी 5.30 यावेळेत मतदान प्रक्रिया पार पडणार आहे. त्यासाठी सोमवारी 1 डिसेंबर रोजी कणकवली तहसिलदार कार्यालय येथून ईव्हीएम मशीन अधिकारी व कर्मचारी रवाना झाले आहेत. मतदान प्रक्रिया शांततेत पार पडण्यासाठी निवडणूक विभागाच्यावतीने पूर्ण तयारी करण्यात आली आहे. कणकवली नगरपंयात निवडणूकीसाठी 17 मतदान केंद्रावर केंद्राध्यक्ष, मतदान अधिकारी, पोलीस, शिपाई असे 85 अधिकारी व कर्मचारी नियुक्त व राखीव पकडून 110 कर्मचाऱ्यांची नेमणूक करण्यात आल्याची माहिती निवडणूक निर्णय अधिकारी दीक्षांत देशपांडे यांनी दिली.
कणकवली तहसिलदार कार्यालय येथे सकाळी 11.30 वाजता मतदान केंद्रावर ईव्हीएम मशीन व मतदान साहित्य नेणाऱ्या वाहनांचा शुभारंभ 11.30 वाजता करण्यात आला. निवडणूक निरिक्षक विवेक गोडके यांनी निवडणुकीचा आढावा घेत कार्यालयाला भेट दिली. यावेळी प्रांताधिकारी जगदीश कातकर, सहाय्यक निर्णय अधिकारी गौरी पाटील, पोलीस निरिक्षक तेजस नलवडे व पोलीस उपनिरिक्षक पवन कांबळे व मतदान अधिकारी व कर्मचारी उपस्थित होते.
कणकवली नगरपंचायत निवडणूकीसाठी 3 झोनल अधिकारी, 1 राखीव झोनल अधिकारी, 17 मतदान केंद्रांवर 1 केंद्राध्यक्ष, 3 मतदान अधिकारी, 1 पोलीस, 1 शिपाई मिळून कामकाजासाठी 85 व राखीव पकडून 110 अधिकारी व कर्मचाऱ्यांच्या नेमणूका करण्यात आल्या आहेत. तर कायदा व सुव्यवस्था राखण्यासाठी पोलीस दलाच्यावतीने पोलीस निरिक्षक तेजस नलवडे यांच्या मार्गदर्शनाखाली 8 पोलीस अधिकारी, 86 पोलीस अंमलदार, पोलीस नाईक कॉंस्टेबल, 68 होमगार्ड असे मिळून 162 पोलीस दलाचे कर्मचाऱ्यांच्या नेमणूका करण्यात आल्या आहेत. या निवडणुकीसाठी एक आचारसंहिता पथक, एक भरारी पथक कार्यरत असणार असल्याचे निवडणूक निर्णय अधिकारी दीक्षांत देशपांडे यांनी सांगितले.
13 हजार 278 आहेत मतदार
कणकवली नगरपंचायत निवडणूकीसाठी अंतिम मतदार यादीनुसार 13 हजार 278 मतदार कणकवलीचा नगराध्यक्ष निवडणार आहेत. भाजप व राष्ट्रवादी काँग्रेस (अजित पवार गट) यांची युती, शिवसेना (उद्धव बाळासाहेब ठाकरे) ,शिंदे शिवसेना, राष्ट्रवादी काँग्रेस शरदचंद्र पवार पक्ष, काँग्रेस तसेच इतर पक्ष यांच्या शहर विकास आघाडी अंतर्गत क्रांती विचार पक्ष व आम आदमी पार्टी, लोकराज्य जनता पार्टी ही निवडणूक स्वतंत्रपणे लढवित आहेत. त्यामुळे या निवडणुकीची रंगत वाढली आहे. नगराध्यक्ष पदासाठी भाजपाकडून समीर नलावडे, क्रांती विचार पक्षाचे संदेश पारकर, लोकराज्य जनता पार्टीचे गणेश प्रसाद पारकर हे 3 उमेदवार रिंगणात आहेत. तर 17 नगरसेवक पदासाठी 36 उमेदवार मिळून 39 उमेदवारांचे भवितव्य मतदान यंत्रात मंगळवारी बंद होणार आहे. सकाळी 7.30 ते सायंकाळी 5.30 वाजेपर्यंत मतदानाची वेळ आहे. या वेळेनंतर मतदान यंत्रे सिल करून येथील तहसील कार्यालयातील स्ट्रॉंन्गरूम मध्ये ठेवण्यात येणार आहेत. तसेच 3 डिसेंबर रोजी मतमोजणी येथील तहसील कार्यालयात करण्यात येणार आहे.
कायदा व सुव्यवस्थेचा प्रश्न निर्माण होऊ नये म्हणून कडक पोलीस बंदोबस्त कणकवली शहरात पोलीस निरीक्षक तेजस नलावडे यांच्या मार्गदर्शनाखाली ठेवण्यात आला आहे.
मतदान केंद्रांवर होणार मतदान!
कणकवली नगरपंचायत निवडणुकीसाठी मंगळवारी रा.बा. उचले प्राथ. शाळा नं. 1, जि.प.शाळा क्र. 2., सद्गुरु भालचंद्र महाराज शाळा क्र. 3, जि.प. शाळा क्र. 5, विद्यामंदीर हायस्कुल कणकवली या 5 शाळांमध्ये 17 केंद्रांवर मतदान होणार आहे. प्रत्येक मतदान केंद्रात एक ईव्हीएम मशीन असणार आहेत. मतदारांनी एकाच ईव्हीएम मशीनवर नगराध्यक्ष व नगरसेवक निवडण्यासाठी मतदान करायचे आहे.
