हिंदुस्थानी पुरुष हॉकी संघाने सुलतान अझलान शाह चषक हॉकी लीगमधील शेवटच्या सामन्यात कॅनडाचा १४-३ गोल फरकाने धुव्वा उडवित अंतिम फेरीतील स्थान पक्के केले. या विजयामुळे हिंदुस्थानने गुणतालिकेत पहिल्या दोन स्थानांपैकी एक कायम राखत रविवारी होणाऱ्या अंतिम सामन्याची तिकीट मिळविले.
हिंदुस्थानकडून बचावपटू जुगराज सिंह सर्वाधिक चार गोल केले. त्याने तीन पेनल्टी कॉर्नरचे गोलमध्ये रूपांतर केले, तर एक गोल पेनल्टी स्ट्रोकवर केला. अभिषेक, अमित रोहिदास आणि राजिंदर सिंह यांनी प्रत्येकी दोन गोल केले. याचबरोबर सेल्वम कार्थी, नीलकंठ शर्मा, संजय आणि दिलप्रीत सिंह यांनी प्रत्येकी एक गोल नोंदविला.
या निकालानंतर, उर्वरित सामन्यांचे निकाल काहीही असले तरी, हिंदुस्थानचा टॉप-२ मधील प्रवास निश्चित झाला आहे. क्रेग फुल्टन यांच्या प्रशिक्षणाखालील हिंदुस्थानी संघ रविवारी अंतिम फेरीत बेल्जियमचा सामना करणार आहे.
बेल्जियमनेच लीग टप्प्यात हिंदुस्थानचा एकमेव पराभव केला होता. शनिवारी उशिरा बेल्जियमने न्यूझीलंडवर ५-१ असा विजय मिळवून चार विजय आणि एक बरोबरीसह गुणतालिकेच्या अव्वल स्थानावर मजल मारली.
