दिल्लीहून रांचीला जाणाऱ्या एअर इंडियाच्या विमानात तांत्रिक बिघाड झाला. यामुळे हवेतूनच विमान दिल्लीला माघारी वळवण्यात आले. सुदैवाने यात कोणतीही दुर्घटना घडली नाही. विमानतळ अधिकाऱ्यांनी घटनेची पुष्टी केली. सोमवारी सायंकाळी ही घटना घडली.
एअर इंडियाचे एआय 9695 या विमानाने सोमवारी सायंकाळी 4.25 वाजता दिल्ली विमानतळाहून रांचीकडे उड्डाण घेतले. हे विमान सायंकाळी 6.20 वाजता रांचीतील बिरसा मुंडा विमानतळावर पोहचणे अपेक्षित होते. मात्र हवेतच या विमानात तांत्रिक बिघाड झाल्याने ते दिल्ली माघारी वळवण्यात आले.
विमानात नेमका कोणता बिघाड झाला, हे अद्याप समजू शकले नाही. एअर इंडियाने अद्याप या घटनेबाबत औपचारिक निवेदन जारी केलेले नाही. विमान सुरक्षितपणे दिल्ली विमानतळावर उतरवण्यात आले. प्रवाशांना कोणतीही दुखापत किंवा त्रास झाल्याचे वृत्त नाही.
