मुंबई महानगरातील विविध रस्त्यांची सिमेंट-काँक्रीटीकरण कामे प्रगतिपथावर आहेत. सिमेंट-काँक्रीटीकरण कामाचा दर्जा, गुणवत्ता चांगली राहावी यासाठी मुंबईतील भारतीय तंत्रज्ञान संस्था (आयआयटी) यांची गुणवत्ता नियंत्रणासाठी नेमणूक करण्यात आली आहे. त्यामुळे रस्ते विकासाची अंमलबजावणी करताना आवश्यक तो दर्जा, गुणवत्ता राखण्याची जबाबदारी भारतीय तंत्रज्ञान संस्थेकडे असेल. या कामकाजासाठी बृहन्मुंबई महानगरपालिका आणि आयआयटी यांच्यात आज सामंजस्य करार करण्यात आला आहे.
बृहन्मुंबई महानगरपालिका हद्दीतील सर्व रस्त्यांचे काँक्रीटीकरण करण्याच्या उद्देशाने पहिल्या टप्प्यात 392 किलोमीटर तर दुसऱया टप्प्यात 309 किलोमीटर असे एकूण मिळून 701 किलोमीटर रस्ते काँक्रीटीकरणासाठी कार्यादेश जारी करण्यात आले आहेत. यामध्ये शहर विभाग, पश्चिम उपनगरे आणि पूर्व उपनगरातील रस्ते कामांचा समावेश आहे. सिमेंट काँक्रीटीकरण कामाचा दर्जा, गुणवत्ता चांगली राहावी यासाठी आयआयटी यांची गुणवत्ता नियंत्रणासाठी थर्ड पार्टी म्हणून नेमणूक करण्याचा निर्णय महानगरपालिका आयुक्त तथा प्रशासक भूषण गगराणी यांनी घेतला आहे. त्या अनुषंगाने आज बृहन्मुंबई महानगरपालिका आणि भारतीय तंत्रज्ञान संस्था यांच्यात सामंजस्य करार करण्यात आला आहे. दुसऱया टप्प्यातील 5 पॅकेज (शहर विभाग 1, पूर्व विभाग 1 आणि पश्चिम विभाग 3) आणि पहिल्या टप्प्यातील 1 पॅकेजच्या कामांची गुणवत्ता तपासणी व अनुषंगिक कामे भारतीय तंत्रज्ञान संस्थेमार्फत केली जाणार आहेत. अधिक गतीने कामे करताना गुणवत्ता ढासळू नये यासाठी कोणत्या बाबींची काळजी घ्यावी यासाठी भारतीय तंत्रज्ञान संस्था मार्गदर्शन करणार आहे, असे भूषण गगराणी म्हणाले.
अशी असणार जबाबदारी
रस्त्यांच्या देखभाल, पुनर्रचना व पुनर्वसनासाठी योग्य पद्धती निश्चित करण्याकामी आवश्यक सल्ला देणे, प्रत्येक प्रकरणाच्या आधारे आवश्यकतेनुसार तपासणी करणे, गुणवत्ता तपासणीचे निकष प्रत्येक प्रकरणाच्या आवश्यकतेनुसार तपासणे, गुणवत्ता आश्वासनासाठी चाचण्या घेणे आणि गुणवत्ता नियंत्रण चाचणी अहवालांची तपासणी करणे, तांत्रिक लेखापरीक्षण अहवाल तयार करणे.
