अहमदाबादमधील विमान दुर्घटनेत मृत्यू झालेले पवई येथील सुमित सभरवाल यांना आज साश्रुनयनांनी अखेरचा निरोप देण्यात आला. कॅप्टन सुमित यांना अखेरचा निरोप देण्यासाठी पवईमध्ये मोठय़ा संख्येने मुंबईकर आले होते. यावेळी कॅप्टन सुमित यांच्या 88 वर्षीय वडिलांना दुःख अनावर झाले. वडिलांचा आधार बनण्याची वेळ असताना बापालाच आपल्या मुलाचे अंतिम दर्शन घ्यावे लागले. त्यामुळे ‘देवा, अशी वेळ कुणावरही येऊ नये,’ अशीच भावना त्यांनी यावेळी व्यक्त केली.
गेल्या चार दिवसांपासून या दुर्घटनेतील मृतांच्या नातेवाईकांना डीएनए सॅम्पलची चाचणी केल्यानंतर त्यांचे मृतदेह सोपविण्यात येत आहेत. सुमित सभरवाल यांचे पार्थिव आज त्यांच्या मुंबईतील घरी आल्यानंतर सोसायटीतील रहिवाशांनी मोठी गर्दी केली होती.
उपस्थितांचेही डोळे पाणावले!
पार्थिवाजवळ पोहोचल्यानंतर लेकाचा रुबाबदार गणवेशातील फोटो पाहून कॅप्टन सुमित यांचे वडील गहिवरले. रडतरडतच त्यांनी लेकाच्या पार्थिवाचे अंत्यदर्शन घेतले. यावेळी उपस्थितांचेही डोळे पाणावले.
