माझगाव डॉक लढाऊ जहाज निर्मितीच्या कारखान्यातील कामगारांचे प्रलंबित प्रश्न लवकरच सुटणार आहेत. कामगारांच्या प्रश्नांसंदर्भात भारतीय कामगार सेनेने आक्रमक भूमिका घेतली. शिवसेना नेते-खासदार अरविंद सावंत यांच्या नेतृत्वाखाली भारतीय कामगार सेनेच्या शिष्टमंडळाने माझगाव डॉक कंपनीच्या व्यवस्थापनाला जाब विचारला. त्यानंतर व्यवस्थापनाने कामगारांचे प्रलंबित प्रश्न सोडवण्याबाबत सकारात्मक प्रतिसाद दिला. प्रलंबित मागण्यांसंदर्भात लवकरच आदेश काढले जातील, असे आश्वासन दिले.
शिवसेना नेते-खासदार अरविंद सावंत यांनी बुधवारी माझगाव डॉक कंपनीचे अध्यक्ष आणि व्यवस्थापकीय संचालक कॅप्टन जगमोहन, महाव्यवस्थापक श्रीनिवास सिन्हा, सहाय्यक महाव्यवस्थापक सत्यनारायण प्रधान, उपमहाव्यवस्थापक प्रदीप महाडेश्वर, अरुण केदारे आणि भारद्वाज या वरिष्ठ अधिकाऱ्यांची भेट घेतली. यावेळी भारतीय कामगार सेनेच्या वतीने दिलीप जाधव, नामदेव नार्वेकर, किरण शिंदे, सचिन राऊळ, मनोज सिंह हे उपस्थित होते. फिक्स्ड टर्म कर्मचाऱ्यांना नियमित सेवेत घेताना सेवाज्येष्ठता न डावलता नियमित करावे, पेन्शनसंदर्भात कंपनी अधिकाऱ्यांच्या बाबतीत 10 टक्के अनुदान देते, तेवढेच अनुदान कामगारांच्या बाबतीत द्यावे, युटिलिटी कर्मचाऱ्यांना सेवाज्येष्ठतेनुसार नियमित सेवेत घ्यावे, फिक्स्ड टर्म कर्मचाऱ्यांना नियमित करून तीन महिन्यांसाठी सेवाकाळ देण्याचे आदेश रद्द करून तो एक वर्षाचा करावा, या मागण्यांकडे खासदार अरविंद सावंत यांनी माझगाव डॉक कंपनीच्या व्यवस्थापनाचे लक्ष वेधले. प्रलंबित मागण्यासंदर्भात भारतीय कामगार सेनेने घेतलेल्या आक्रमक भूमिकेनंतर कंपनी व्यवस्थापनाने कामगारांच्या प्रलंबित मागण्या पूर्ण करण्याबाबत सकारात्मक प्रतिसाद दिला.
