मुंबई शहर आणि उपनगरातील वाहतूक कोंडीवर मात करण्यासाठी ऑरेंज गेट ते मरीन ड्राईव्ह आणि ठाणे ते बोरिवली दरम्यान भुयारी मार्ग बांधण्यात येत आहे. या प्रकल्पासाठी राज्य सरकारने एमएमआरडीएला सुमारे तीनशे कोटी रुपयांचा निधी वितरित केला आहे.
मुंबईतील वाहतूककोंडी दूर करण्यासाठी हे दोन भुयारी मार्ग बांधण्यात येणार आहेत. ऑरेंज गेट ते मरीन ड्राईव्ह दरम्यानच्या भुयारी मार्गासाठी राज्य शासनाचे बिनव्याजी दुय्यम कर्ज म्हणून एमएमआरडीएला 90 कोटी रुपये देण्यास त्याचबरोबर ठाणे ते बोरिवली दरम्यान भुयारी मार्गासाठी 210 कोटी रुपये बिनव्याजी दुय्यम कर्ज वितरित करण्यास नगरविकास विभागाने मान्यता दिली आहे.
पूर्व द्रुतगती मार्गावरून थेट दक्षिण मुंबईत
पूर्व मुक्त मार्गावरून वाहनांना थेट मरीन ड्राईव्हपर्यंत जाण्यासाठी वाहतुकीचा मोठा चक्रव्यूह फोडून जावे लागते. त्यामुळे दक्षिण मुंबईतील वाहतूककोंडीवर मात करण्यासाठी पी डी’मेलो मार्गावरील ऑरेंज गेट ते मरीन ड्राईव्ह असा भुयारी मार्ग बांधण्यात येणार आहे. वाहतुकीसाठी दोन बोगदे बांधण्यात येणार आहेत. एका बोगद्याची लांबी सुमारे 4.27 किमी तर दुसऱ्या बोगद्याची लांबी 2.24 कि.मी. आहे. त्यात 3.2 मीटर रुंदीच्या दोन मार्गिका तर एक आपत्कालीन मार्गिका ठेवणार आहे. या बोगद्यापर्यंत पोहोचण्यासाठी 190 मीटरचा मार्ग बांधण्यात येणार आहे. या प्रकल्पाच्या कामासाठी लार्सन अँड टुब्रो कंपनीची कंत्राटदार म्हणून नियुक्ती केली आहे.
देशातील सर्वात मोठा भुयारी मार्ग
ठाणे ते बोरिवली प्रवासासाठी सध्या दीड ते दोन तासांचा प्रवास करावा लागतो. त्यामुळे या प्रवासासाठी भुयारी मार्ग बांधण्यात येत आहे. संजय गांधी राष्ट्रीय उद्यानाच्या खालून हा भुयारी रस्ता जाणार आहे. या भुयारी मार्गामुळे ठाणे ते बोरिवली हे अंतर सुमारे बारा मिनिटांत पार करता येईल. या भुयारी रस्त्यात दोन मार्गिका असतील. एक आपत्कालीन मार्गिका आहे. या भुयारी मार्गात सिग्नल नसेल. त्यामुळे वेगवान प्रवास होणार आहे. हा प्रकल्प 2028पर्यंत पूर्ण करण्याची योजना आहे. या भुयारी मार्गामुळे घोडबंदर रोड व पश्चिम द्रुतगती महामार्गावरील वाहतूककोंडी दूर होईल.
