श्रीलंकेत थैमान घालून 153 जणांचा बळी घेतल्यानंतर ‘दितवाह’ हे चक्रीवादळ आता हिंदुस्थानच्या दिशेने सरकले आहे. त्याच्या प्रभावामुळे तामीळनाडू, पुद्दुच्चेरी तसेच आंध्र प्रदेशच्या किनारपट्टीलगतच्या भागात मुसळधार पावसाने झोडपले असून त्यामुळे जनजीवन विस्कळीत झाले आहे.
तामीळनाडू, पुद्दुच्चेरी, केरळ आणि आंध्र प्रदेशात पुढील 4 दिवस मुसळधार पावसाचा इशारा देण्यात आला आहे. कोलंबोच्या बंदरनायके आंतरराष्ट्रीय विमानतळावर सुमारे 300 हिंदुस्थानी प्रवासी अडकले आहेत. श्रीलंकेत अजूनही 200 पेक्षा जास्त नागरिक बेपत्ता असून 78 हजारांपेक्षा जास्त लोकांना मदत छावण्यांमध्ये हलविण्यात आलेले आहे.
हिंदुस्थानचे ‘ऑपरेशन सागर बंधू’
शेजारधर्म पाळत हिंदुस्थानने श्रीलंकेच्या मदतीसाठी ऑपरेशन सागर बंधू सुरू केले आहे. हिंदुस्थानी हवाई दलाचे आयएल-76 विमान एनडीआरएफच्या 80 जणांच्या पथकासह अन्न, औषधे व जीवनावश्यक वस्तूंचा सुमारे 27 टन साठा घेऊन कोलंबोमध्ये पोहोचले आहे. हिंदुस्थानने आणखी मदत पाठविण्याचे आश्वासनही दिले आहे.
