गेल्या अनेक महिन्यांपासून प्रलंबित असलेल्या माझगाव डॉक शिपबिल्डर्स लिमिटेडमधील कामगारांच्या मागण्यांबाबत ऐतिहासिक बैठक पार पडली. बैठकीनंतर माझगाव डॉकचे व्यवस्थापन कामगारांच्या मागण्यांकडे गांभीर्याने व सहानुभूतीपूर्वक पाहील, असे ठोस आश्वासन दिल्याने कर्मचाऱ्यांनी शिवसेनेचे आभार मानले आहेत.
माझगाव डॉक शिपबिल्डर्स लिमिटेडमधील कर्मचाऱ्यांच्या प्रलंबित मागण्यांसंदर्भात शिवसेना नेते-खासदार अनिल देसाई आणि स्थानीय लोकाधिकार समिती महासंघाचे सरचिटणीस प्रदीप मयेकर यांनी माझगाव डॉकचे चेअरमन आणि मॅनेजिंग डायरेक्टर पॅ. जगमोहन यांची भेट घेऊन कामगारांच्या प्रश्नांना वाचा पह्डली. माझगाव डॉकचे व्यवस्थापन कामगारांच्या मागण्यांकडे गांभीर्याने व सहानुभूतीपूर्वक पाहील, असे ठोस आश्वासन बैठकीनंतर देण्यात आले.
कर्मचाऱ्यांमध्ये आनंदाचे वातावरण
व्यवस्थापनासोबत झालेल्या बैठकीत नोकरभरती, कामगार कल्याण (वेल्फेअर), कंत्राटी कामगारांचे करार नूतनीकरण तसेच इतर महत्त्वाच्या मुद्दय़ांवर सविस्तर व सडेतोड चर्चा झाली. खासदार अनिल देसाई यांच्या पाठिंब्यामुळे आणि प्रदीप मयेकर यांच्या पाठपुराव्यामुळे ही बैठक अत्यंत सकारात्मक वातावरणात पार पडली. प्रलंबित मागण्या मान्य होणार असल्याने कर्मचारी आनंदाने भारावले आहेत. या बैठकीला स्थानीय लोकाधिकार समिती महासंघाचे संघटन सचिव दिनेश बोभाटे, महासंघ चिटणीस किरण शिंदे, नामदेव नार्वेकर, सुनील दळवी, सचिन राऊळ आदी प्रमुख पदाधिकारी उपस्थित होते.
