तमिळनाडूची राजधानी चेन्नईमध्ये गेल्या काही दिवसांत शेकडो कावळे मृतावस्थेत आढळल्याने मोठी खळबळ उडाली आहे. प्रयोगशाळेतील तपासणीनंतर या पक्षांचा मृत्यू ‘H5N1’ या घातक विषाणूमुळे (बर्ड फ्लू) झाल्याचे निष्पन्न झाले आहे. या पार्श्वभूमीवर आरोग्य विभागाने तातडीने मार्गदर्शक सूचना (Advisory) जारी केल्या असून नागरिकांना सतर्क राहण्याचे आवाहन केले आहे.
प्रशासनाची खबरदारी आणि उपाययोजना
पक्षांमधील हा संसर्ग रोखण्यासाठी मृत कावळे आणि कुक्कुटपालन केंद्रातील मृत पक्षांची विल्हेवाट लावण्यासाठी कडक प्रोटोकॉल पाळण्याचे आदेश देण्यात आले आहेत. संसर्ग अधिक पसरू नये यासाठी मृत पक्षांचे अवशेष जाळले जातील किंवा खोल जमिनीत गाडले जातील. केंद्रीय पशुसंवर्धन मंत्रालयाने तमिळनाडूच्या मुख्य सचिवांना पत्र लिहून संपूर्ण परिसरात तातडीने देखरेख (Field Surveillance) वाढवण्याचे निर्देश दिले आहेत.
नागरिकांसाठी सूचना: आरोग्य विभागाने नागरिकांना स्पष्ट बजावले आहे की, कोणत्याही मृत पक्षाला स्पर्श करू नका किंवा त्यांच्या संपर्कात येऊ नका. कोठेही मृत पक्षी आढळल्यास त्वरित स्थानिक प्रशासनाला किंवा महानगरपालिकेला कळवावे.
काय आहे H5N1 विषाणू?
H5N1 हा ‘इन्फ्लूएंझा ए’ विषाणूचा एक प्रकार आहे, ज्याला सर्वसामान्य भाषेत ‘बर्ड फ्लू’ किंवा ‘एव्हियन इन्फ्लूएंझा’ म्हटले जाते. हा प्रामुख्याने पक्षांमध्ये, विशेषतः कोंबड्यांमध्ये पसरतो. जरी हा संसर्ग प्रामुख्याने पक्षांना होत असला, तरी संक्रमित पक्षांच्या विष्ठा, लाळ किंवा त्यांच्या संपर्कात आलेल्या वस्तूंमुळे हा मानवांमध्येही पसरू शकतो. मानवांमध्ये हा संसर्ग दुर्मिळ असला तरी तो अत्यंत गंभीर ठरू शकतो, ज्यामुळे न्यूमोनिया किंवा श्वसनाचा त्रास होण्याची शक्यता असते.
h5n1 bird flu alert in chennai: hundreds of crows found dead, advisory issued for public
health authorities confirm h5n1 avian influenza in chennai after hundreds of crows died. check the latest safety advisory and symptoms of bird flu.
