अमेरिका, इस्रायल-इराण यांच्यातील युद्धामुळे जागतिक अस्थिरता वाढली आहे. कच्च्या तेलाचे भाव गगनाला भिडले असून जगावर उर्जा संकट घोंघावत आहे. तसेच युद्ध काळात सोने आणि चांदीमधील गुंतवणूक सुरक्षित मानली जात असल्याने त्यात गुंतवणूक वाढते. मात्र, हे युद्ध याला अपवाद ठरले असून सोने-चांदीच्या दरात मोठी घसरण झाली आहे. आता सोने चांदी निचांकी स्तरावर आल्याने अनेकजण खरेदीची संधी साधत आहे. त्यामुळे बुधवारी सोनेचांदीमध्ये जबरदस्त तेजी दिसून आली.
आखाती युद्धामुळे जगभरात मोठ्या प्रमाणावर घबराट पसरली आहे. शेअर बाजारातील घबराट व तेल आणि वायू संकटामुळे जागतिक तणाव वाढला आहे. अमेरिका, इस्रायल आणि इराण यांच्यातील युद्धाला पंचवीस दिवस उलटले आहेत, आणि बिघडत चाललेल्या जागतिक परिस्थितीच्या पार्श्वभूमीवर, सोने आणि चांदीच्या किमती वाढण्याऐवजी सतत घसरत आहेत, आणि हे दोन्ही मौल्यवान धातू त्यांच्या उच्चांकी दरांपेक्षा मोठ्या प्रमाणात स्वस्त झाले आहेत.
हे युद्ध २८ फेब्रुवारी रोजी सुरू झाले, आणि तेव्हापासून मल्टी कमोडिटी एक्सचेंज (MCX) वर सोन्याचा दर प्रति १० ग्रॅम २३,००० पेक्षा जास्त घसरला आहे आणि सोने आता त्याच्या उच्चांकी दरापेक्षा ५४,००० ने स्वस्त झाले आहे. चांदीची अवस्था बिकट असून ती तिच्या उच्चांकी दराच्या निम्म्या किमतीला विकली जात आहे.
अमेरिका, इस्रायल आणि इराण यांच्यातील युद्धाला २५ दिवस उलटले असून, सोने आणि चांदीच्या दरात लक्षणीय घसरण झाली आहे. या काळात सोने २३,००० रुपयांनी स्वस्त झाले आहे, तर चांदीचे दर प्रति किलो ५४,००० रुपयांपेक्षा जास्त घसरले आहेत.
गेल्या महिन्याच्या शेवटच्या दिवशी २८ फेब्रुवारी रोजी अमेरिका आणि इस्रायलने इराणवर हल्ले केले. त्याच्या आदल्या दिवशी, २७ फेब्रुवारी रोजी, एमसीएक्सवर (MCX) १० ग्रॅम २४-कॅरेट सोन्याचा भाव १,६२,१०४ होता. मात्र, मंगळवार तो घसरून १,३८,७४३ झाला होता. याचा अर्थ असा की, या २५ दिवसांत सोन्याचा भाव प्रति १० ग्रॅम २३,३६१ ने घसरला आहे.
सोन्याच्या उच्चांकाबद्दल बोलायचे झाल्यास, २९ जानेवारी रोजी ते प्रति १० ग्रॅम १,९३,०९६ या विक्रमी उच्चांकावर वेगाने पोहोचले होते आणि या पातळीवर पोहोचल्यापासून त्यात सतत घसरण होत आहे. सध्याच्या वायदे दराच्या तुलनेत, २ एप्रिल रोजी मुदत संपणारे सोने आता प्रति १० ग्रॅम ५४,३५३ इतक्या कमी दरात उपलब्ध आहे.
इराण युद्धाच्या सुरुवातीपासून चांदीच्या किमतीत मोठी घसरण होऊन गुंतवणूकदारांना सातत्याने आश्चर्याचा धक्का बसला आहे. २७ फेब्रुवारी रोजी, एमसीएक्सवर ५ मे रोजी मुदत संपणाऱ्या १ किलो चांदीचा भाव २,८२,६४४ रुपये होता आणि मंगळवार २४ मार्चपर्यंत तो घसरून २,२४,२१० रुपये प्रति किलो झाला होता. अशाप्रकारे, या युद्धकाळात चांदी आतापर्यंत ५८,४३४ रुपयांनी स्वस्त झाली आहे.
चांदीच्या उच्चांकाबद्दल बोलायचे झाल्यास, केवळ सोन्यानेच नव्हे, तर चांदीनेही २९ जानेवारी रोजी इतिहासात प्रथमच ४ लाख रुपयांचा टप्पा ओलांडला होता आणि तिचा वायदा भाव ४,२०,०४८ रुपयांच्या उच्चांकावर पोहोचला होता. या पातळीवरून चांदीचा भाव आता जवळपास निम्मा झाला आहे. गेल्या सोमवारी चांदीचा भाव २ लाख रुपये प्रति किलोच्या खाली आला होता.
सोने चांदीचे दर घसरल्याने अनेकजण निचांकी पातळीवर सोनेचांदीची खरेदी करत आहेत. त्यामुळे बुधवारी या दोघांच्या दरात चांगलीच तेजी दिसत आहे. वायदे बाजारात बुधवारी सोन्याचे दर ५५५१० रुपयांनी वाढून ते १,४७,८८८ वर व्यवहार करत होते. तर चांदीचे दर १२८२१ रुपयांनी वाढून ते२३६७७६ वर व्यवहार करत होते. बुधवारी झालेल्या या वाढीमुळे सोनेचांदीत पुन्हा तेजी येण्याचे संकेत मिळत आहे.
