आजकाल जवळपास प्रत्येक घरात खाण्यापिण्याच्या ठेवण्यासाठी फ्रिजचा वापर केला जातो. योग्य तापमानावर अन्नपदार्थ स्टोअर केल्यास त्यांची गुणवत्ता टिकून राहते आणि ते लवकर खराब होत नाहीत. तथापि, अनेक जण असा विचार करतात की प्रत्येक खाण्याची वस्तू फ्रिजमध्ये ठेवणे फायदेशीर ठरते, पण प्रत्येक वेळी हे योग्यच असेल असे नाही.
काही खाण्यापिण्याच्या वस्तू अशा असतात, ज्या फ्रिजमध्ये ठेवल्याने त्यांची चव, आणि गुणवत्ता खराब होऊ शकते. तसेच, काही पदार्थांमध्ये दमटपणा वाढल्यामुळे किंवा खूप कमी तापमानामुळे ते लवकर खराब देखील होऊ शकतात. पदार्थांचा ताजेपणा आणि गुणवत्ता टिकवून ठेवण्यासाठी त्या योग्य पद्धतीने स्टोअर करणे गरजेचे आहे.
बटाटे
बटाटे फ्रिजमध्ये ठेवल्यास कमी तापमानामुळे त्यातील स्टार्चचे वेगाने साखरेत रूपांतर होऊ शकते. यामुळे बटाट्याची चव आणि बदलू शकते. तसेच, असे बटाटे खूप जास्त तापमानावर शिजवल्यास त्यामध्ये काही हानिकारक घटक तयार होण्याची शक्यता वाढते. बटाटे नेहमी थंड, सुक्या आणि अंधाऱ्या जागी ठेवणे अधिक योग्य मानले जाते.
कांदा
कांदा फ्रिजमध्ये ठेवल्यास तेथील दमट वातावरणामुळे तो लवकर मऊ पडू शकतो आणि त्याला बुरशी लागण्याचा धोका वाढतो. कांदा नेहमी हवेशीर आणि सुक्या जागी ठेवणे फायदेशीर आहे. मात्र, कापलेला कांदा एअरटाईट डब्यात बंद करून थोड्या वेळासाठी फ्रिजमध्ये ठेवला जाऊ शकतो.
लसूण
लसूण फ्रिजमध्ये ठेवल्याने तेथील ओलाव्यामुळे त्याला मोड येऊ शकतात किंवा बुरशी लागू शकते. अख्खा लसूण नेहमी थंड, सुक्या आणि हवेशीर जागी स्टोअर करणे योग्य ठरते.
केळी
केळी फ्रिजमध्ये ठेवल्यास तिची साल लवकर काळी पडू शकते आणि थंड तापमानामुळे केळी नैसर्गिकरीत्या पिकण्याची प्रक्रिया देखील बाधित होते. जर केळी पूर्णपणे पिकलेली नसेल, तर ती सामान्य तापमानावरच ठेवणे अधिक चांगले.
ब्रेड
ब्रेड फ्रिजमध्ये ठेवल्याने ती लवकर सुकते आणि कडक होते. यामुळे त्याची चव आणि मऊपणा कमी होतो. जर ब्रेड 2 ते 3 दिवसांत वापरायचा असेल, तर ती सामान्य तापमानावर बंद पॅकेटमध्ये ठेवावी.
कोणते अन्नपदार्थ फ्रिजमध्ये ठेवणे आवश्यक आहे?
दूध, दही, पनीर, लोणी (बटर), अंडी, शिजवलेले अन्न, कापलेल्या भाज्या आणि फळे, मटण, मासे आणि इतर लवकर खराब होणारे अन्नपदार्थ फ्रिजमध्ये ठेवणे आवश्यक मानले जाते. या गोष्टी योग्य तापमानावर ठेवल्यास त्यामध्ये बॅक्टेरियाची वाढ मंदावते आणि त्यांची गुणवत्ता दीर्घकाळ टिकून राहते.
फ्रिजमध्ये अन्न स्टोअर करताना कोणत्या गोष्टींची काळजी घ्यावी?
- खाण्याचे पदार्थ नेहमी स्वच्छ आणि एअरटाईट कंटेनरमध्ये स्टोअर करा.
- गरम जेवण थोडे थंड झाल्यानंतरच फ्रिजमध्ये ठेवा.
- कच्चा माल (उदा. कच्चे मांस/भाज्या) आणि शिजवलेले अन्न वेगवेगळे ठेवा.
- फ्रिजमध्ये क्षमतेपेक्षा जास्त सामान भरू नका, कारण यामुळे थंड हवेचा प्रवाह बाधित होतो.
- वेळोवेळी फ्रिजची स्वच्छता करा आणि एक्स्पायरी डेट संपलेल्या किंवा खराब झालेल्या गोष्टी त्वरित बाहेर फेका. यामुळे अन्न अधिक सुरक्षित आणि ताजे राहते.
