इराण आणि इस्रायलमधील सुरू असलेल्या युद्धात अमेरिकेनेही उडी घेतली आहे. अमेरिकेने इराणच्या अणुऊर्जा केंद्रावर केलेल्या हल्ल्यानंतर, इराणने संयुक्त राष्ट्रांची आपत्कालीन बैठक बोलावली होती. या बैठकीत त्यांनी अमेरिकेला उघडपणे धमकी दिली आहे. या बैठकीत इराणने आता सैन्याला फ्री हॅन्ड दिलेला असून, आता सर्व काही सैन्य ठरवेल. राष्ट्राध्यक्ष डोनाल्ड ट्रम्प यांनी आधी सांगितले होते की, ते इराणवर हल्ला करायचा की नाही याचा विचार करतील, परंतु नंतर अचानक अमेरिकेने हल्ला केला.
अलजझीराच्या वृत्तानुसार इराण म्हणाला, “अमेरिकन आणि इस्रायलच्या हल्ल्यांपासून स्वतःचे रक्षण करण्याचा आंतरराष्ट्रीय कायद्यानुसार इराणचा पूर्ण अधिकार आहे. इराणच्या प्रत्युत्तराची वेळ आता सशस्त्र दल ठरवतील.” इराणचे संयुक्त राष्ट्र सुरक्षा परिषदेतील राजदूत अमीर सईद इरावनी यांनी संयुक्त राष्ट्र सुरक्षा परिषदेच्या आपत्कालीन बैठकीत सांगितले की, “अमेरिकेने इराणच्या तिन्ही अणुस्थळांवर हल्ला करून स्वतःला युद्धात सहभागी केले आहे.” इरावनीने अमेरिकेवर बनावट आणि हास्यास्पद सबबी देऊन इराणविरुद्ध युद्ध पुकारल्याचा आरोप केला आहे.
अमेरिकेने इराणी अणुस्थळांवर केलेल्या हल्ल्यानंतर संयुक्त राष्ट्रांचे सरचिटणीस अँटोनियो गुटेरेस यांनी इशारा दिला होता की, या कृतीमुळे विनाशकारी दलदल निर्माण होऊ शकते. संयुक्त राष्ट्रांच्या आपत्कालीन बैठकीत सरचिटणीस अँटोनियो गुटेरेस म्हणाले, “इराणी अणुस्थळांवर अमेरिकेच्या हल्ल्यामुळे आता अधिकच धोका निर्माण झाला आहे. मुख्य म्हणजे हा भाग आधीच खूप मोठ्या संकटांशी सामना करत आहे.”
इराणचे परराष्ट्र मंत्री अब्बास अराघची यांनीही अमेरिकेला इशारा दिला. अराघची म्हणाले की, अमेरिकेने इराणच्या अणुस्थळांवर हल्ला करून संयुक्त राष्ट्रांच्या घोषणापत्राचे, आंतरराष्ट्रीय कायद्याचे आणि अणुप्रसार अप्रसार कराराचे (एनपीटी) गंभीर उल्लंघन केले आहे.
13 जूनपासून सुरू झालेल्या या इस्रायली हल्ल्यात दोन्ही बाजूंनी मृतांची संख्या 1000 च्या आसपास पोहोचली आहे. एपी या वृत्तसंस्थेने दिलेल्या माहितीनुसार, या हल्ल्यात आतापर्यंत 950 इराणी नागरिकांचा मृत्यू झाला असून, 3450 जखमी झाले आहेत.
