>> मृणाल घनकुटे
गेल्या काही वर्षांत आपल्यापैकी बरेच लोक हनुवटीवर मुरूम येणे या समस्येला बळी पडले आहेत. कोविडदरम्यान मास्क वापरल्यामुळे – गाल, तोंड आणि नाकाभोवती मुरूम फुटणे हे बऱयाच लोकांनी अनुभवले. हनुवटीवरील मोठय़ा मुरुमावरील समस्येवर एक सोपा उपाय म्हणजेच पिंपल पॅच. पिंपल पॅच कसे काम करतात आणि त्याचा फायदा कसा होतो, याबाबत बोईसर येथील डॉ. त्वचा स्किन क्लिनिकच्या डर्मटॉलॉजिस्ट डॉ. हेमांगी राऊत-आंग्रे यांनी माहिती दिली.
कोणते घटक आवश्यक
पिंपल पॅचमध्ये मुरुमांशी लढा देणारे फायदेशीर घटक असतात जे त्वचेत खोलवर जाऊन चांगला परिणाम देऊ शकतात. तुम्हीही पिंपल पॅच घेताना त्यात हे घटक द्रव्य आहेत की नाही याची खात्री करून घ्यावी. सर्वात महत्त्वाचे घटक म्हणजे ः
- सॅलिसिलिक ऍसिड ः हे एक बीटा-हायड्रॉक्सी ऍसिड आहे ज्यामध्ये दाहक-विरोधी गुणधर्म आहेत जे बंद झालेल्या छिद्रांमध्ये प्रवेश करते आणि लालसरपणा आणि जळजळ कमी करते.
- हायलुरोनिक ऍसिड ः ज्यामध्ये आर्द्रता टिकवून ठेवण्याचे गुणधर्म आहेत जे सॅलिसिलिक ऍसिडच्या कोरडे प्रभावांना संतुलित करण्यास मदत करतात.
- टी ट्री ऑईल ः जे मुरूम कोरडे करू शकते आणि ते जलद बरे होऊ शकते.
- नियासिनामाईड ः जे तुमच्या त्वचेचा पोत आणि टोन सुधारू शकते.
फायदे काय आहेत
जळजळ आणि तुमच्या त्वचेला बरे होण्यासाठी लागणारा वेळ दोन्ही कमी करण्याव्यतिरिक्त, पिंपल पॅच वापरण्याचे इतरही अनेक फायदे आहेत. मुरुमांच्या ठिपक्यामुळे त्वचेवरील डाग किंवा नंतर हायपरपिग्मेंटेशन विकसित होण्यापासून रोखण्यासाठी मदत होऊ शकते. संवेदनशील, कोरडी त्वचा असलेल्या लोकांसह किंवा फक्त सौम्य पुरळ असलेल्या व्यक्तीही याचा वापर करू शकतात. याबाबत तज्ञांचा सल्ला घेणे फायदेशीर ठरते.
कसे चालते काम
पिंपल पॅच ( मुरुमांचा पॅच) हे हायड्रोकोलॉइड नावाच्या पदार्थापासून बनवलेले लहान गोलाकार स्टिकर आहे. ते जिलेटिन जेलपासून बनवले जाते. हे
चिकट पट्टी म्हणून कार्य करते, त्वचेवर संरक्षणात्मक सील तयार करते आणि मुरुमांमधून तेल आणि घाण यांसारखे अतिरिक्त द्रव शोषून घेते. ते मुरुमांभोवती असलेले जास्तीचे द्रव जसे की पू किंवा तेल शोषून घेतो. डाग पडणे टाळता येते आणि बरे होण्याच्या प्रक्रियेला गती मिळते. हे पॅच मुरुमावर चिकटवल्याने त्याला मॉइश्चरायझ करते. हायड्रोकोलॉइड पिंपल पॅच पांढरा होईल, तेव्हा तो काढून टाकण्याची वेळ आली आहे, हे समजते.
