चार राज्यांतील पाच विधानसभा जागांसाठी झालेल्या पोटनिवडणुकांची मतमोजणी पूर्ण झाली आहे. एकूण पाचपैकी दोन जागांवर आम आदमी पक्षाचा विजय झाला आहे. काँग्रेस, भाजप आणि तृणमूल काँग्रेस पक्षाला प्रत्येकी एका जागेवर विजय झाला आहे.
गुजरातमधील कडी मतदारसंघातून भाजपचे उमेदवार राजेंद्र चावडा विजयी झाले आहेत, तर विसावदर मतदारसंघातून आम आदमी पक्षाचे उमेदवार गोपाल इटालिया यांनी विजय मिळवला आहे. केरळच्या नीलांबूर मतदारसंघात काँग्रेसने माकपचा पराभव करून ही जागा पुन्हा मिळवली आहे. पश्चिम बंगालच्या कालीगंज मतदारसंघात तृणमूल काँग्रेसच्या उमेदवार अलीफा अहमद यांना भाजपच्या उमेदवाराविरोधात निर्णायक आघाडी मिळाली आहे. पंजाबच्या लुधियाना पश्चिम मतदारसंघातून आम आदमी पक्षाचे उमेदवार विजयी झाले आहेत.
19 जून रोजी झालेल्या या पोटनिवडणुकांमध्ये केरळमधील नीलांबूरमध्ये 75.27 टक्के, पश्चिम बंगालच्या कालीगंजमध्ये 73.76 टक्के, गुजरातच्या विसावदरमध्ये 56.89 टक्के आणि कडीमध्ये 57.91 टक्के मतदान झाले. पंजाबच्या लुधियाना पश्चिममध्ये 51.33 टक्के मतदान झाले होते.
गुजरातमधील कडी ही जागा आमदार करसन सोलंकी यांच्या निधनामुळे रिक्त झाली होती, तर विसावदरमध्ये आम आदमी पक्षाचे आमदार भूपेंद्र भयानी यांनी राजीनामा दिला होता. केरळमधील नीलांबूर मतदारसंघ काँग्रेसचे पी. व्ही. अन्वर यांनी राजीनामा दिला होता. पंजाबच्या लुधियाना पश्चिमध्ये आमदार गुरप्रीत बस्सी गोगी यांच्या निधनामुळे ही जागा रिक्त झाली होती. पश्चिम बंगालमधील कालीगंज मतदारसंघ आमदार नसरुद्दीन अहमद यांच्या निधनामुळे रिक्त झाला होता.
