मस्साजोगचे सरपंच संतोष देशमुख (Santosh Deshmukh Case) हत्येमुळे बीड (Beed) जिल्ह्यात वाढलेल्या गुन्हेगारीची सध्या राज्यभरात चर्चा आहे. यातच बीडचं पालकमंत्रिपद स्वीकारल्यानंतर उपमुख्यमंत्री अजित पवार (Ajit Pawar) आज पहिल्यांदाच बीड दौऱ्यावर आहेत. यावेळी त्यांनी अजित पवार गटाच्या पदाधिकाऱ्यांची बैठक घेतली. या बैठकीत त्यांनी कार्यकर्त्यांना सज्जड दम दिला आहे. या बैठकीत बोलताना अजित पवार म्हणाले की, खंडणी सारखे प्रकार केले तर मकोका लावायलाही मागेपुढे पाहणार नाही.
काय म्हणाले अजित पवार?
कार्यकर्त्यांशी संवाद साधताना अजित पवार म्हणाले की, ”आपलं स्वतःच चारित्र्य स्वच्छ ठेवा. आपली प्रतिमा चांगली ठेवा. चुकीच्या प्रवृत्तीची लोक आपल्या आजूबाजूला अजिबात राहू देऊ नका. काबाबतही सगळ्यांनी काळजी घ्या.”
‘विकासकामांत खंडणी मागू नका’
अजित पवार म्हणाले की, ”मी आपल्याला सगळ्यांना सांगतोय की, ”विकासाची कामे करत असताना कोणी कोणलाही खंडणी मागण्याचा प्रकार करू नये. माझ्या हे कानावर आल्यानंतर त्यावर मी मकोका लावायलाही मागेपुढे बघणार नाही. मी कुठलीही टोकाची भूमिका घेईन, मीआधीच देवेंद्र फडणवीस यांना सांगितलं होतं की, मला येथील पालकमंत्रिपद देत असताना त्या संदर्भात सगळ्यांनी चांगल्या कामाला साथ दिली पाहिजे.”
