धोम धरणाच्या खाली व्याहळी ते धोमला जाणाऱया कृष्णा नदीच्या पात्रावरील नवीन पुलाचे बांधकाम पूर्ण झाले असून, या पुलामुळे पश्चिम भागाच्या वैभवात भर पडली आहे. तसेच जोर व जांभळी खोऱयातील नागरिक व पर्यटकांना वाईहून येण्या-जाण्यासाठी लागणारे अंतर, वेळ, इंधनाच्या खर्चाची बचत होणार आहे.
कृष्णा नदीवर प्रथम धोम व नंतर बलकवडी येथे धरण बांधण्यात आले. या धरणामुळे राज्यातील हजारो एकर जमीन ओलिताखाली आली व दुष्काळी भागालाही पाणी मिळाले. मात्र, येथील भूमिपुत्रांना विस्थापित व्हावे लागले. येथील दोन्ही भागांतील या पुलाची मागणी कित्येक वर्षांपासून होती. कारण पावसाळ्यात तसेच कधीही पलीकडे जायचे म्हटले की वाई शहरातून जाण्याशिवाय पर्याय नव्हता. जवळ जवळ 16 कि.मी. अंतर अधिक प्रवास करावा लागत होता. त्यासाठी वेळ, इंधन खर्चाचा भुर्दंड बसत होता. या नवीन पुलामुळे आता तो वाचणार आहे. त्यामुळे येथील जनतेत समाधानाचे वातावरण आहे. या पुलामुळे पर्यटकांची संख्या वाढून स्थानिक युवक नागरिक यांना रोजगाराच्या संधी उपलब्ध होणार आहेत.
धोममधून पाणी सोडल्यानंतरही पुलावरून होणार प्रवास
– धोम धरणाखाली नवीन झालेल्या पुलासाठी 8.50 कोटी निधी खर्च झाला असून, तो पूर्णत्वास गेला आहे. पुलाची लांबी 93.94 मीटर असून, 16.477 चे दोन गाळे व 15.477चे चार गाळे, पुलाची रुंदी 10 मीटर, आरसीसी आर्च पद्धतीच्या उंच पुलाच्या दोन्ही बाजूला 50 मीटर लांबीचे पोहच रस्ते डांबरीकरण करून तयार करण्यात आले आहेत. धोम धरणातून पावसाळ्यात नदीपात्रात पाणी सोडल्यावरही पुलावरून प्रवास करता येणार आहे. स्थानिक व पर्यटकांसाठी हा पूल मोठे आकर्षण व सेल्फी पॉइंट ठरणार आहे.
या पुलामुळे जोर, जांभळी दोन्ही खोऱयांतील शेतकऱयांना शेतीमालाची ऊस वाहतूक करण्याचा व स्थानिक नागरिक पर्यटक यांना प्रवासासाठी जवळचा मार्ग उपलब्ध झाला आहे. यामुळे अंतर, वेळ, इंधनाची बचत होईल. – महेश गोंजारी, उपअभियंता, सार्वजनिक बांधकाम विभाग
