दिल्लीतील द्वारका सेक्टर 13 मधील एका इमारतीत भीषण आग लागल्याची घटना घडली. ‘सबद अपार्टमेंट या इमारतीतील एका खोलीत मंगळवारी अचानक आग लागल्यामुळे एकच गोंधळ उडाला. या आगीतून वाचण्यासाठी एका कुटुंबातील दोन मुलं आणि त्यांच्या वडिलांनी इमारतीवरून उडी मारली. पण दुर्दैवाने तिघांचाही मृत्यू झाला.
मिळालेल्या माहितीनुसार, मंगळवारी सकाळी 10 च्या सुमारास ही घटना घडली. यावेळी आगीचे लोळ इतके भयंकर होते की त्यामुळे एका कुटुंबातील लोकांनी जीव वाचवण्यासाठी मोठे पाऊल उचलले. यावेळी कुटुंबातील भाऊ-बहीण आणि मग वडिलांनी इमारतीवरून उडी घेतली. मात्र जीव वाचवण्यासाठी घेतलेली उडी तिघांच्याही जीवावर बेतली. उंचावरून उडी घेतल्यामुळे दुर्दैवाने तिघांचाही मृत्यू झाला. या घटनेची माहिती मिळतातच अग्निशमन दलाच्या गाड्या घटनास्थळी दाखल झाल्या. आणि त्यांनी बचावकार्य सुरू केले. या घटनेचा व्हिडीओ सोशल मीडियावर व्हायरल झाला आहे. यामध्ये ‘सबद अपार्टमेंटमधील एका खोलीतून आगीचे लोळ उठताना दिसत आहेत.
दरम्यान, अग्निशमन दलाच्या अधिकाऱ्यांनी बचावकार्य करत असताना नागरिकांना शांत राहून सहकार्य करण्याचे आणि कोणत्याही प्रकारच्या अफवा न पसरवण्याचे आवाहन केले. ज्या इमारतीत आग लागली त्या इमारतीत राहणाऱ्या सर्व लोकांनी सोसायटीमधील काही लोकांवर आरोप केले आहेत. इमारतीत आग लागल्याचे समजल्यावरही त्यांनी कोणतीही कारवाई केली नाही. या संपूर्ण प्रकरणात निष्काळजीपणा दाखवण्यात आला, असे ते म्हणाले.
