विधिमंडळाच्या अर्थसंकल्पीय अधिवेशनात आमदारांची लक्षवेधी असताना शिंदे-फडणवीस सरकारचे मंत्री गैरहजर असल्याने विधानसभेचे विरोधी पक्षनेते अजित पवार यांनी संताप व्यक्त केला. त्यांनी गैरहजर असल्याबाबत संसदीय मंत्री चंद्रकांत पाटील यांच्यासह इतर मंत्र्यांना जनाची नाही, तर किमान मनाची काही आहे का? असा सवाल केला. यानंतर उपमुख्यमंत्री देवेंद्र फडणवीस यांनी सभागृहात दिलगिरी व्यक्त केली. तसेच ही बाब गंभीर असल्याचे सांगितले.
देवेंद्र फडणवीस म्हणाले की, अजित पवारांनी जी बाब उपस्थित केली ती गंभीरच आहे. मी त्याचे अजिबात समर्थन करणार नाही. उलट आज सभागृहात जो प्रकार घडला त्याबद्दल मी दिलगिरीच व्यक्त करतो. काल रात्री एक वाजेपर्यंत सभागृह चालले. त्यामुळे ‘ऑर्डर ऑफ द डे’ रात्री एक वाजता निघाला. तो एक वाजता निघत नाही. अध्यक्ष रात्री 9 किंवा 10 वाजता ऑर्डर ऑफ द डे काढतात. अडचण अशी आहे की त्यानंतर मंत्र्यांना आढावा घ्यावा लागतो. तो आढावा मंत्र्यांनी कधी घ्यायचा हा प्रश्न असतो, असे देवेंद्र फडणवीस यांनी सांगितले.
फडणवीस पुढे म्हणाले, अशावेळी 9.30 वाजता लक्षवेधी लागल्या तर मंत्र्यांना आढावा घ्यायला वेळच मिळत नाही. आम्ही मंत्र्यांना जरूर समज देऊ. त्यांनी उपस्थित राहिलेच पाहिजे. अध्यक्षांनाही विनंती आहे की, एखाद्या दिवशी उशिरापर्यंत कामकाज चालत असेल, तर आधी ऑर्डर ऑफ द डेची असुधारित प्रत पाठवून द्यावी. त्यामुळे सकाळच्या लक्षवेधींचं ब्रिफिंग घेता येईल. याबाबत अध्यक्षांनी निर्देश द्यावेत, असेही फडणवीस म्हणाले. मी सभागृहाला आश्वस्त करतो की, अपवादात्मक परिस्थिती सोडता सर्व मंत्री उपस्थित राहतील, असेही ते म्हणाले.
लक्षवेधी असताना मंत्री गेरहजर असल्याने अजित पवार यांनी संताप व्यक्त केला. ते म्हणाले की, आज सभागृहात केवळ मंगलप्रभात लोढांची लक्षवेधी झाली. सहा मंत्री गैरहजर होते. यांना जनाची नाही, तर किमान मनाची काही आहे का? अशाप्रकारचे शब्द वापरताना आम्हालाही वाईट वाटते. काल रात्री एक-दीड वाजेपर्यंत लोक बसली. सकाळी ज्यांची लक्षवेधी होती ते दोन्हीकडील आमदार आले आणि मंत्रीच उपस्थित नाही. मंत्र्यांना असं काय काम आहे, असा सवालही अजित पवार यांनी केला.
देवेंद्र फडणवीसांना आम्ही विश्वासू-प्रामाणिक म्हणून पाहतो. त्यांना उच्चविद्याविभूषित अशी नावं दिली आहेत, पण त्यांचंही लक्ष नाही. त्यांनी त्यांच्या काही मंत्र्यांना सांगावं. मुख्यमंत्री-उपमुख्यमंत्री रात्री दोन वाजेपर्यंत काम करतात. त्यामुळे त्यांना सकाळी लवकर येण्याची अडचण आम्ही समजून घेतो. मात्र, चंद्रकांत पाटील रात्री दोन-अडीचपर्यंत जागत नाहीत. त्यांनी सकाळी लवकर उठून आले पाहिजे. संबंधित ज्यांची लक्षवेधी आहे त्यांनी आलं पाहिजे, असे मत अजित पवार यांनी व्यक्त केलं. त्यांच्या या संतापाची दखल घेत फडणवीस यांनी सभागृहात दिलगिरी व्यक्त करत ही बाब गंभीर असल्याचे मान्य केले.
