जगप्रसिद्ध जगन्नाथ रथयात्रा शुक्रवारपासून सुरू झाली. पुरीसह देशभरातील प्रमुख शहरांमध्येही आता जगन्नाथ रथयात्रा निघते. गुजरातमधील अहमदाबाद येथेही शुक्रवारी सकाळी जगन्नाथ रथयात्रा निघाली. मात्र या रथयात्रेवेळी काही हत्ती बिथरले आणि भाविकांची एकच पळापळ सुरू झाली. या दरम्यान चार भाविक जखमी झाले.
डीजेच्या आवाजाने हे हत्ती बिथरल्याची प्राथमिक माहिती मिळत आहे. या घटनेचा व्हिडीओही सोशल मीडियावर व्हायरल झाला आहे. यात बिथरलेला हत्ती वाट दिसेल तिकडे आणि हत्तीच्या भीतीने लोक सैरावैरा धावताना दिसत आहेत.
View this post on Instagram
अहमदाबादमध्ये शुक्रवारी 148 वी जगन्नाथ रथयात्रा काढण्यात आली. या रथयात्रेच्या पुढे 17 हत्तींचा एक गट चालत होता. याच दरम्यान अचानक तीन हत्ती बिथरले. यातील दोन मादी हत्ती, तर एक नर हत्ती होता. बिथरलेले हत्ती अनियंत्रित झाल्याने रथयात्रेत सहभागी झालेले भाविक सैरावैरा पळू लागले. अखेर वन विभागाने या हत्तींवर नियंत्रण मिळवले. सध्या या तीन हत्तींना रथयात्रेतून हटवण्यात आले असून 14 हत्तींसह रथयात्रा पुढे सरकत आहे.
जगन्नाथ रथयात्रेचा मार्ग सोन्याच्या झाडूने का स्वच्छ करतात? जाणून घ्या काय आहे पौराणिक मान्यता
