तस्करी करण्यासाठी आणि पकडले जाऊ नये म्हणून आरोपी शक्कल लढवत असतात. मात्र अबूधाबीहून आलेल्या प्रवाशाने सोने तस्करीसाठी जी युक्ती लढवली ते ऐकून सीमाशुल्क विभागाचे अधिकारीही चक्रावले. या प्रवाशाला चेन्नई विमानतळावर ताब्यात घेण्यात आले आहे. हा आरोपी अबूधाबीहून मुंबईत दोन किलो सोनं घेऊन आला होता. तस्करी करताना पकडले जाऊ नये म्हणून आरोपीने भन्नाट कल्पना लढवली पण अखेर तो जाळ्यात अडकलाच.
काय आहे प्रकरण?
हा तस्कर 12 जून रोजी इंडिगो विमानाने अबूधाबीहून 2 कोटींहून अधिक किंमतीचं सोनं घेऊन मुंबईत आला. मात्र त्याने सोनं सोबत न घेता विमानात सीटखालीच लपवून ठेवलं. मग तो सुरक्षित मुंबई विमानतळाबाहेर पडला. यानंतर तो मुंबईहून चेन्नईला गेला. अबूधाबीहून तो ज्या विमानाने मुंबईत आला त्या विमानाचं लाईव्ह ट्रॅकिंग तो करत राहिला. लाईव्ह ट्रॅकिंगद्वारे 14 जून रोजी हे विमान कोलकाताहून चेन्नईला उड्डाण करणार असल्याचे त्याला समजले. यानंतर तो चेन्नईहून कोलकात्याला गेला. आरोपीने तेच विमान आणि तीच सीट बुक करत कोलकात्याहून चेन्नईला आला. यादरम्या त्याने सीटखालून लपवलेलं सोनं ताब्यात घेतलं.
चेन्नई विमानतळावरून हे सोनं घेऊन तो बाहेर पडण्याच्या प्रयत्नात होता. मात्र सीमाशुल्क विभागाच्या अधिकाऱ्यांना संशय आला आणि त्याचा प्रयत्न फसला. सीमाशुल्क विभागाच्या अधिकाऱ्यांनी त्याच्या सामानाची तपासणी केली असता त्याच्याकडे पेस्टच्या स्वरुपात सोनं आढळलं. आरोपीची चौकशी केली असता सर्व प्रकार समोर आला आणि सीमाशुल्क विभागाचे अधिकारीही कारनामा ऐकून हैराण झाले. अधिकाऱ्यांनी आरोपीकडून दोन कोटीहून अधिक किमतीचं सोनं जप्त केलं आहे. तसेच आरोपीने विमान प्रवास करण्यासाठी बोगस आधारकार्डचा वापर केल्याचेही तपासात निष्पन्न झाले. हे बोगस आधारकार्डही जप्त केले आहे.
