टीम इंडिया आणि इंग्लंड यांच्यातील पाच सामन्यांच्या कसोटी मालिकेतील पहिला कसोटी सामना लिड्स येथे खेळला जात आहे. नाणेफेक गमावल्यानंतर फलंदाजीसाठी आलेल्या टीम इंडियाची सुरुवात चांगली आहे. सलामीला आलेल्या यशस्वी जैसवालने खणखणीत शतक ठोकत आपले इंग्लंडच्या गोलंदाजांचा चांगलाच समाचार घेतला. त्याला टी ब्रेकनंतर कर्णधार बेन स्टोक्सने बाद केलं.
यशस्वीने सलामीला येत 159 चेंडूंचा सामना करत 16 चौकार आणि 1 षटकार खेचत 101 धावा केल्या. यशस्वी चांगल्या लयीत दिसत होता. परंतु बेन स्टोक्सने त्याचा त्रिफळा उडवत त्याला तंबुत धाडले. त्याला केएल राहुल (42) आणि कर्णधार शुभमन गिलने चांगली साथ मिळाली. त्यामुळे टीम इंडियाने तिसऱ्या सत्रात 200 चा आकडा पार केला आहे. टी ब्रेकनंतर टीम इंडियाला यशस्वीच्या स्वरुपात तिसरा हादरा बसला. पहिलाच सामना खेळणाऱ्या साई सुदर्शनला मात्र भोपळा फोडता आला नाही. सध्या सामना सुरू असून 54 षटकांच्या अंती टीम इंडियाने 3 गड्यांच्या मोबदल्यात 226 धावा केल्या आहेत. कर्णधार शुभमन गिल (नाबाद 67) आणि ऋषभ पंत (नाबाद 06) नाबाद खेळत आहेत.
