इराणमध्ये अडकलेले हिंदुस्थानी विद्यार्थी सध्याच्या घडीला चिंतेत आहेत. युद्धाच्या पार्श्वभूमीवर आता हे विद्यार्थी कसे परततील याकडे साऱ्यांचं लक्ष लागलेलं आहे. इराणने सोमवारी हिंदुस्थानच्या आवाहनाला प्रतिसाद दिला आहे. हिंदुस्थानने इराणमध्ये अडकलेल्या हिंदुस्थानी विद्यार्थ्यांना सुरक्षितपणे बाहेर काढले पाहिजे असे म्हटले होते. यालाच प्रतिसाद देत आता इराणने एक नवीन मार्ग शोधला आहे.
तेहरानने याबाबत म्हटले आहे की, इराणचे हवाई क्षेत्र बंद असले तरी सर्व जमीनी मार्ग खुले आहेत. त्यामुळे हिंदुस्थानी नागरिक तेथून सुरक्षितपणे बाहेर पडू शकतात. इराणच्या परराष्ट्रमंत्र्यांनी हिंदुस्थानला आश्वासन दिले आहे की, त्यांच्या राजदूतांना आणि सामान्य नागरिकांना सुरक्षितपणे बाहेर काढण्यासाठी मदत केली जाईल.
इराणच्या परराष्ट्र मंत्रालयाने काय म्हटले?
इराणच्या परराष्ट्र मंत्रालयाने म्हटले आहे की, “सध्याची परिस्थिती आणि विमानतळ बंद असल्याने, सर्व जमीनी मार्ग खुले आहेत, जेणेकरून अडकलेले नागरिक बाहेर जाऊ शकतील.”
इराणने हिंदुस्थानला आवाहन केले आहे की, जमीनी मार्गाने देशाबाहेर जाऊ इच्छिणाऱ्यांची नावे, पासपोर्ट क्रमांक, वाहनांची माहिती, प्रवासाचा वेळ आणि सीमा ही सर्व माहिती इराणच्या जनरल प्रोटोकॉल विभागाला देण्यात यावी. यामुळे इराण राजदूत आणि इतरांचा प्रवास सुरक्षित राहावा यासाठी आवश्यक व्यवस्था करू शकेल.
इस्रायल आणि इराणमध्ये सुरू असलेल्या क्षेपणास्त्र हल्ल्यांमुळे इराणच्या अनेक शहरांमध्ये हजारो हिंदुस्थानी अडकले आहेत. यामध्ये1,500 हून अधिक हिंदुस्थानी विद्यार्थ्यांचा समावेश आहे, त्यापैकी बहुतेक जम्मू आणि काश्मीरमधील आहेत.
सोमवारी (16 जून 2025) हिंदुस्थानने सांगितले की, इराणमध्ये राहणाऱ्या काही हिंदुस्थानी विद्यार्थ्यांना तेथील सुरक्षित भागात हलवण्यात आले आहे. असेही सांगण्यात आले की इतर कोणते उपाय करता येतील यावरही विचार केला जात आहे. परराष्ट्र मंत्रालयाने म्हटले आहे की, “तेहरानमधील हिंदुस्थानी दूतावास परिस्थितीवर लक्ष ठेवून आहे आणि विद्यार्थ्यांशी सतत संपर्कात आहे. दूतावासाच्या मदतीने काही विद्यार्थ्यांना सुरक्षित ठिकाणी पाठवण्यात आले आहे.” दूतावासाने एक गुगल फॉर्म देखील शेअर केला आहे. या फाॅर्ममध्ये हिंदुस्थानींना त्यांची माहिती भरण्यास सांगितले आहे.
