आरोपींना जामीन मंजूर करण्याच्या प्रक्रियेत सुसूत्रता आणण्यासाठी केंद्र सरकारने जामीन कायद्याच्या स्वरुपात स्वतंत्र कायदा करावा, असे महत्वपूर्ण निर्देश सर्वेच्च न्यायालयाने सोमवारी दिले. तसेच तपास यंत्रणेतील अधिकाऱयांनी फौजदारी दंड संहितेच्या कलम 41(ए) मधील तरतुदींचे काटेकोर पालन केलेच पाहिजे, असेही खंडपीठाने यावेळी बजावले. सर्वेच्च न्यायालयाच्या या भूमिकेमुळे जामिनाची प्रक्रिया सुरळीत मार्गी लागण्याची चिन्हे आहेत.
याप्रकरणी सोमवारी न्यायमूर्ती एस. के. कौल आणि न्यायमूर्ती एम. एम. सुंदरेश यांच्या खंडपीठासमोर सुनावणी झाली. या खंडपीठाने जामीन मंजूर करण्याच्या प्रक्रियेत सुसूत्रता आणण्याच्या हेतूने स्वतंत्र कायदा करण्याची सूचना केंद्र सरकारला केली. त्याचबरोबर इतरही काही महत्त्वाचे निर्देश दिले. हे निर्देश तपास यंत्रणेबरोबरच कनिष्ठ न्यायालयांनाही बंधनकारक असल्याचे खंडपीठाने यावेळी स्पष्ट केले. यासंदर्भात सर्व राज्य सरकारे आणि केंद्रशासित प्रदेश तसेच उच्च न्यायालयांनी पुढील चार महिन्यांच्या कालावधीत प्रतिज्ञापत्र आणि स्थिती अहवाल दाखल करावा, असेही न्यायालयाने नमूद केले आहे. तसेच या निकालाचे रेकॉर्ड केंद्र सरकार, राज्ये आणि केंद्रशासित प्रदेशांना पाठवण्याचे निर्देश रजिस्ट्रीला देण्यात आले आहेत.
कच्च्या कैद्यांच्या जामीन प्रक्रियेत मदत करा!
जे कैदी जामिनाच्या अटी-शर्तींची पूर्तता करू शकत नाहीत, अशा कैद्यांची यादी बनवा. अशा कैद्यांची जामिनावर सुटका होण्यासंबंधी रखडलेली प्रक्रिया मार्गी लावण्यासाठी आवश्यक ती पावले उचला, अशी सूचना सर्वेच्च न्यायालयाने सर्व उच्च न्यायालयांना केली आहे. सीबीआयने एका व्यक्तीला केलेल्या अटकेच्या कारवाईसंबंधी सुनावणीवेळी न्यायालयाने हे निर्देश दिले.
न्यायालयाचे विविध निर्देश
- फौजदारी दंड संहितेच्या कलम 41 आणि 41(ए)मधील तरतुदींचे पालन करणे सर्व तपास यंत्रणा व त्या यंत्रणांच्या अधिकाऱयांना बंधनकारक असेल.
- जे तपास अधिकारी संबंधित तरतुदींचे पालन करणार नाहीत, त्या अधिकाऱयांचा हलगर्जीपणा वरिष्ठ अधिकाऱयांच्या निदर्शनास आणून द्यावा व त्यानंतर त्यांच्यावर कारवाई करण्यात यावी.
- जर न्यायालयांनी फौजदारी दंड संहितेच्या कलम 41 आणि 41(ए)चे पालन केले नाही, तर अशा प्रकरणातील आरोपी जामिनासाठी पात्र ठरेल.
- विशेष न्यायालय स्थापन करणे तसेच रिक्त पदांवर भरती करणे यासंबंधी निर्देशांचे राज्य आणि केंद्र सरकारांनी तातडीने पालन करावे.
