मंत्रालयात वारंवार होणारे आत्महत्येचे प्रयत्न रोखण्यासाठी तसंच, सुरक्षेसाठी बांधलेल्या जाळीवर केल्या जाणाऱ्या आंदोलनाच्या पार्श्वभूमीवर आता गृहविभागाने नवीन सूचना जारी करण्यात आल्या आहेत. मंगळवारी मंत्रालयात एका व्यक्तिने शिक्षक भरतीच्या मागणीसाठी दुसऱ्या मजल्यावरील जाळीत उतरून आंदोलन करायचा प्रयत्न केला. त्यानंतर असे प्रकार वारंवार घडू नयेत म्हणून या सूचना जारी करण्यात आल्या आहेत.
या सुचनांनुसार, मंत्रालयात येणाऱ्या सर्व व्यक्तिंना प्रवेश पास बंधनकारक असेल. यासाठी पुढील काही दिवसांत ऑनलाईन पासेस देण्याची सुविधाही सुरू करण्यात येणार आहे. दररोज मंत्रालयात येणाऱ्यांची संख्या सरासरी 5 हजार प्रतिदिन पेक्षा जास्त आहे. त्यामुळे आता मंत्रालयात येणाऱ्या अभ्यागतांची संख्या किती असावी, यासाठी पोलीस उपायुक्त, मंत्रालय सुरक्षा यांना सूचना देण्यात आल्या आहेत.
काय आहेत या सूचना?
मंत्रालयात येणाऱ्या अभ्यागतांसाठी गार्डन गेट येथे अद्ययावत सुरक्षा तपासणी कक्ष तयार केले जाणार आहेत.
मंत्रालयात यापुढे मंत्री आणि सचिव यांच्या गाड्यांना प्रवेश राहील. तर खासगी गाड्यांसाठी योग्य ती परवानगी घेऊनच प्रवेश दिला जाईल.
मंत्रालयामध्ये प्रवेश करणाऱ्या व्यक्तींना आरएफआयडी स्वरुपाचे प्रवेशपत्र देण्याची कार्यवाही सुरू आहे.
जो पर्यंत आरएफआयडी स्वरुपाचे प्रवेश पत्रिका देण्याची कार्यवाही देण्याची कार्यवाही सुरू होत नाही, तोपर्यंत मंत्रालयामध्ये प्रत्येक मजल्यासाठी कलर कोड पत्रिका देण्याची व्यवस्था मंत्रालय सुरक्षा विभागामार्फत करण्याच्या सूचना देण्यात आल्या आहेत.
अभ्यागतांना कायालयीन वेळेनंतर मंत्रालयामध्ये थांबू न देण्याच्या सूचनाही देण्यात आल्या आहेत.
मंत्रालयात बाहेरील खाद्यपदार्थ आणण्यास मनाई करण्यात आली आहे. यामध्ये जेवणाचे डबे हे वगळण्यात आले आहेत.
मंत्रालय अंतर्गत आणि बाह्य परिसराची सीसीटीव्ही मार्फत सतत निगराणी ठेण्यात येईल. संरक्षक जाळी ओलांडून प्रवेशाचा प्रयत्न होत असल्यास त्याबाबत अलर्ट संदेश देणारी कार्य प्रणाली पोलीस उपायुक्त, मंत्रालय सुरक्षा यांनी एक महिन्यात कार्यन्वित करण्याच्या सूचना.
मेट्रो सब वे येथे सुरक्षा तपासणी कक्ष उभारण्याबाबत सूचना.
सर्व प्रकारच्या कंत्राटी कामगारांची सीसीटीएनएस यंत्रणेद्वारे तपासणी.
मंत्रालयाच्या टेरेसवर जाण्याचे सर्व मार्ग बंद करण्याबाबत सूचना.
तसेच मंत्रालयाच्या मोकळ्या कॉरिडॉरमध्ये खिडक्यांमधून किंवा प्रत्येक मजल्यावरील मोकळ्या जागांमधून उडी मारण्याचा प्रयत्न होऊ शकतो. अशा ठिकाणी दिसणार नाहीत अशा पद्धतीचे स्टील रोप्स लावण्याची कार्यवाही सार्वजनिक बांधकाम विभागाने एक महिन्यात करण्याच्या सूचना.
मंत्रालय परिसरात पाळीव प्राण्यांना प्रतिबंध करण्यात आला आहे.
मंत्रालयामध्ये प्रवेश करण्याऱ्या अभ्यागतांनी त्यांच्यासोबत दहा हजारपेक्षा अधिक रक्कम घेऊन मंत्रालयात प्रवेश करण्यास मनाई करण्यात येत आहे.
वारंवार मंत्रालयात प्रवेश करण्याची कारणमीमांसा यादी तयार करण्याच्या सूचना.
मंत्रालयामध्ये आपत्कालिन परिस्थिती हाताळण्यासाठी अग्निशमन वाहन तातडीने प्रवेश करू शकेल अशी व्यवस्था मंत्रालय सुरक्षा कक्षाने कार्यान्वित करावी.
मंत्रालय सुरक्षेसाठी कार्यान्वित असलेली ड्रोन यंत्रणा सुस्थितीत ठेण्याबाबत सूचनाही गृह विभागाने दिल्या आहेत
लोकप्रतिनिधी यांच्या सोबत येणाऱ्या नागरिकांनाही पास काढावा लागणार.
ज्या विभागात काम आहे त्याच विभागात जाता येणार अन्यथा कारवाई केली जाणार.
कार्यालयीन कामकाजाची वेळ संपल्यानंतर मंत्रालयात थांबता येणार नाही.
