‘मिस वर्ल्ड 2025’ स्पर्धेचा महाअंतिम निकाल उद्या 31 मे 2025 रोजी जाहीर केला जाणार आहे. मिस वर्ल्ड कोण होणार असून जागतिक सौंदर्यवतीचा मुकुट कोणाच्या डोक्यावर ठेवला जाणार आहे, हे अवघ्या काही तासांत स्पष्ट होईल. राजस्थानच्या कोटा या शहरातील नंदिनी गुप्ता हिच्याकडे तमाम हिंदुस्थानींच्या नजरा लागल्या आहेत. अवघ्या 21 वर्षीय नंदिनी हिंदुस्थानचे प्रतिनिधित्व करत आहे. नंदिनीने 19 व्या वर्षी फेमिना मिस इंडियाचा किताब आपल्या नावावर केलेला आहे. त्याआधी तिने ‘मिस राजस्थान’सुद्धा आपल्या नावावर केलेला आहे. त्यामुळे ‘मिस वर्ल्ड’ किताब नंदिनीच्या डोक्यावर येईल, असे अनेकांना वाटत आहे.
नंदिनीने एका मुलाखतीत सांगितले की, 10 वर्षांची असताना तिने मिस इंडिया बनण्याचे स्वप्न पाहिले होते. 2023 मध्ये हे स्वप्न खरे करून दाखवले आहे. नंदिनी गुप्ता हिचा जन्म 2004 साली कोटामध्ये झाला. तिने नुकतेच मुंबईतील लाला लजपत राय कॉलेजमधून बिझनेस मॅनेजमेंटची पदवी मिळवली आहे. नंदिनी गुप्ता ही अभिनेत्री प्रियांका चोप्राला आपले आदर्श मानते. प्रियांकाने 2000 साली ‘मिस वर्ल्ड’चा किताब जिंकला होता. नंदिनीला डान्स करणे, चित्रपट पाहणे आणि प्रवास करणे खूप आवडते. ग्रँड फिनाले शनिवारी हैदराबादेत पार पडणार आहे. या कार्यक्रमाला सायंकाळी साडे सहा वाजता सुरुवात होणार आहे. या इव्हेंटला लाईव्ह सुद्धा पाहता येऊ शकते. सोनी लीव किंवा www.watchmissworld.com या वेबसाईटवरून हा कार्यक्रम पाहता येईल.
