प्रॉपर्टीच्या हिश्श्याच्या वादातून सावत्र सासूची हत्या करून तिच्या अंगावरील सोन्याचे दागिने चोरून नेणाऱ्या सुनेला अखेर घाटकोपर पोलिसांनी 24 तासात बेडय़ा ठोकल्या. गुन्हा करून सटकली तरी कोणी पकडणार नाही अशा भ्रमात ती असताना पोलिसांनी तिला शिताफीने अटक केली.
मुमताज खान असे आरोपी महिलेचे नाव आहे. कुर्ल्यात राहणाऱ्या मुमताजची सावत्र सासू शहनाज काझी (65) या घाटकोपर येथील हिमालय सोसायटीत राहत होत्या. एकटय़ाच राहणाऱ्या शहनाज यांची बुधवारी दुपारी त्यांच्या घरात डोक्यात मारहाण करून त्यांची हत्या करण्यात आली होती. आरोपीने शहनाज यांना ठार मारल्यानंतर त्यांच्या अंगावरील सोन्याचे दागिने चोरून नेले होते. हा प्रकार कळताच घाटकोपर पोलीस ठाण्यात अज्ञात व्यक्तीविरोधात हत्येचा गुन्हा दाखल करण्यात आला होता. वरिष्ठांच्या मार्गदर्शनाखाली सपोनि तिरमारे, खरमाटे व पथकांनी तत्काळ तपास सुरू केला. सीसीटीव्ही फुटेजमध्ये बुरखा घातलेली महिला संशयास्पद हालचाल करताना दिसून आली. त्याआधारे माग काढत पोलीस मुमताजला अटक केली.
