
मुंबई महानगरपालिका क्षेत्राचा होणारा विस्तार व वाढणारी लोकसंख्या पाहता मुंबईसाठी दोन पालिका आयुक्त असणे गरजेचे आहे. शहर आणि उपनगरासाठी दोन जिल्हाधिकारी आहेत. त्या प्रमाणे मुंबईसाठी दोन आयुक्त असावेत अशी मागणी मुंबईचे पालकमंत्री अस्लम शेख यांनी केली आहे. यासंदर्भात राज्याच्या नगरविकास विभागाकडेदेखील आपण मागणी केली असल्याची माहिती शेख यांनी शनिवारी दिली.
मुंबई उपनगरात राहणाऱया नागरिकांना विविध प्रशासकीय कामांसंदर्भात छत्रपती शिवाजी टर्मिनस येथील पालिका मुख्यालयात यावे लागते. आयुक्तांची दोन पदे निर्माण केल्यास मुंबई उपनगरात राहणाऱया नागरिकांना प्रशासकीय व्यवहार करणं सोयीचं ठरेल, असे शेख यांनी म्हटले आहे.




























































