दिवाळी संपली की सांस्कृतिक, साहित्यिक कार्यक्रमांची रेलचेल दिसून येते. नोव्हेंबर ते जानेवारी या कालावधीत अनेक सांस्कृतिक, साहित्यि महोत्सव पार पडत आहेत. साहित्यिक कार्यक्रम, पुस्तक महोत्सव असे कार्यक्रम म्हणजे पर्वणीच. यात नॅशनल बुक ट्रस्ट सारख्या मोठय़ा संस्थांपासून अगदी प्रकाशनगृहंदेखील असा महोत्सव साजरा करतात. नुकताच ग्रंथाली प्रकाशनाद्वारे असा साहित्यिक महोत्सव पार पडला. ग्रंथाली हे केवळ व्यावसायिक तत्वावर काम करीत नाही तर वाचक चळवळ उभी करण्यात अशा प्रकाशनांचा मोठा वाटा आहे. 21 ते 23 नाव्हेंबर या कालावधीत पार पडलेल्या या महोत्सवात रसिक वाचक, साहित्य क्षेत्रात अभिरुची असणार्या सार्यांसाठी वेगवेगळे कार्यक्रम आयोजित केले गेले होते. चर्चात्मक कार्यक्रम, परिसंवाद, कविता-गझल सादरीकरण, अभिवाचन, ग्रंथदिडी अशा वेगवेगळ्या स्वरूपाचे कार्यक्रम यावेळी पार पडले. येत्या काळातही वाचक, साहित्यरसिकांना विशेष महोत्सवात सहभागी होण्याची संधी लाभणार आहे. डिसेंबर महिन्यातील दुसर्या शनिवार पासून पुण्यात नॅशनल बुक ट्रस्टचा पुणे पुस्तक महोत्सव पार पडणार आहे. गेल्या वर्षी या महोत्सवात रेकॉर्डब्रेक गर्दी झाली होती. यंदाही तितकाच प्रतिसाद या महोतसवाला लाभेल यात शंका नाही.
