कुंडमळा येथील घटना ताजी असतानाच पुण्यात भीषण अपघाताची घटना घडली आहे. कोथरुड येथील वेदभवन पुलावर सोमवारी पहाटेच्या सुमारास तीन ते चार वाहने एकमेकांवर आदळली. अपघातात एका गाडीच्या पुढच्या भागाचा चक्काचूर झाला. तर अन्य दोन गाड्यांचेही मोठे नुकसान झाले. अपघातामुळे या मार्गावरील वाहतूक काही काळ विस्कळीत झाली होती.
अपघाताची माहिती मिळताच कोथरुड पोलीस, अग्नीशमन दलाच्या दोन गाड्या आणि पथक तात्काळ घटनास्थळी दाखल झाले. अग्नीशमन दलाच्या जवानांनी रेस्क्यू ऑपरेशन राबवत अपघातग्रस्त वाहनात अडकलेल्या चालकाला बाहेर काढले. जखमी चालकाला उपचारासाठी रुग्णालयात दाखल करण्यात आले आहे.
अपघातग्रस्त वाहने क्रेनच्या सहाय्याने बाजूला करत या मार्गावरील वाहतून सुरळीत करण्यात आली. अपघात नेमका कोणत्या कारणातून झाला हे अद्याप समजू शकले नाही. कोथरुड पोलीस अपघातग्रस्त वाहनांची तपासणी आणि घटनास्थळी मिळालेल्या पुराव्यांच्या आधारे पुढील तपास करत आहेत.
