किल्ले रायगड व परिसर विकास पर्यटन आराखडा प्राधिकरणाची कामे वेगाने करताना कामांची गुणवत्ता व दर्जा कायम राखावा, असे आदेश उपमुख्यमंत्री अजित पवार यांनी दिले. या प्राधिकरणाला प्राधान्याने निधी उपलब्ध करून देणार असल्याची ग्वाही उपमुख्यमंत्र्यांनी यावेळी दिली.
मंत्रालयात आयोजित बैठकीत अजित पवार यांनी रायगड किल्ला व परिसर विकास पर्यटन आराखडा प्राधिकरणाचा आढावा घेतला. सांस्पृतिक कार्य विभाग, पर्यटन विभाग, पुरातत्व विभाग, जिल्हा प्रशासनाने समन्वय राखून प्राधिकरणाला कामकाजात सहकार्य करावे, या प्राधिकरणाला मंजूर असलेला यंदाच्या आर्थिक वर्षातील निधी शंभर टक्के वितरित करावा, असे निर्देशही त्यांनी यावेळी दिले. या बैठकीला सांस्कृतिक कार्यमंत्री अमित देशमुख, पर्यटनमंत्री आदित्य ठाकरे, पर्यटन राज्यमंत्री आदिती तटकरे, प्राधिकरणाचे अध्यक्ष खासदार संभाजीराजे छत्रपती आदी उपस्थित होते.
स्थानिकांना रोजगार
रायगड किल्ल्याच्या परिसरातील 21 गावांचा विकास आणि स्थानिकांना पर्यटनाच्या माध्यमातून रोजगार उपलब्ध व्हावा यासाठी राज्य सरकार प्रयत्नशील आहे, असेही अजित पवार यांनी सांगितले.
शास्त्रोक्त पद्धतीने जतन करावे
रायगड किल्ल्याचा आणि परिसराचा विकास करण्यासाठी रायगड किल्ला व परिसर विकास पर्यटन आराखडा प्राधिकरणाला निधी कमी पडू देणार नाही. या प्राधिकरणाच्या कामकाजात कोणतीही अडचण येऊ नये यासाठी रायगड जिल्हा नियोजन समितीला निधी उपलब्ध करून देण्यात येईल. या निधीचा विनियोग पालकमंत्री, जिल्हा प्रशासन आणि प्राधिकरणाने समन्वयाने करावा. राजमाता जिजाऊ माँसाहेबांचा वाडा, समाधीचे संवर्धन, जतन करण्याचे काम, शिवसृष्टी उभारणी ही सर्व कामे शास्त्रोक्त पद्धतीने करावीत. ऐतिहासिक वारसा सांगणाऱ्या वास्तूंचे जतन आणि संवर्धन करावे, अशी अपेक्षा अजित पवार यांनी व्यक्त केली.
