तालुक्यात अतिवृष्टी होऊन दहा महसूल मंडळात शेतकऱ्यांच्या खरीप पिकांचे अतोनात नुकसान झाले असून, सरसकट पंचनामे सरकार करत नाही, असा आरोप करत माकणी थोर येथील सरपंच राहुल माकणीकरने आज दुपारी निलंग्याचे तहसीलदार प्रसाद कुलकर्णी यांच्या अंगावर पैशांचे बंडल फेकून सरकारचा निषेध केला आहे. 23 रोजी मुख्यमंत्री देवेंद्र फडणवीस औराद शाहजानी येथील तेरणा व मांजरा संगमावर जाऊन नुकसानीची व पूर पाहणी केली; परंतु ठोस अश्वासन दिले नाही. निलंगा तालुक्यातील दहा मंडळापैकी तीनच मंडळ सरसकट नुकसानभरपाईमध्ये घेत आहे. आम्हाला तुटपुंजी मदत नको, असा संताप व्यक्त करत माकणी थोर येथील सरपंच राहुल माकणीकर यांनी तहसीलदार यांच्या दालनात जाऊन पैशाचे बंडल तहसीलदारांच्या अंगावर फेकले व सरकार व महसूल प्रशासन याचा जाहीर निषेध केल्याचे सरपंच राहुल माकणीकर यांनी बोलताना सांगितले.
