शिवशक्ती महिला संघाने शिवनेरी सेवा मंडळ आयोजित स्थानिक महिला गट राज्यस्तरीय कबड्डी स्पर्धेचे विजेतेपद पटकावले. शिवशक्तीची पूजा यादव स्पर्धेतील सर्वोत्तम खेळाडू ठरली. तिला रोख रु. पाच हजार (5,000-) व भेटवस्तू देऊन गौरविण्यात आले. दादर शिंदेवाडी येथील भवानीमाता क्रीडांगणावर झालेल्या महिलांच्या अंतिम सामन्यात शिवशक्तीने डॉ. शिरोडकरचा कडवा प्रतिकार 41-36 असा मोडून काढत स्व. भागीरथीबाई सावंत स्मृती चषक व रोख रु. पंचवीस हजार (25,000-) आपल्या खात्यात जमा केले. उपविजेत्या शिरोडकरला स्व.सौ. सुवर्णा परब चषक व रोख रु. पंधरा हजार (15,000-) यावर समाधान मानावे लागले.
शिरोडकरच्या मेघा कदमने पहिल्याच चढाईत गुण घेत संघाचे खाते खोलले. त्यानंतर सलग आणखी 3 गुण घेत 4-0 अशी आघाडी घेतली. शिवशक्तीने मेघाची अव्वल पकड करीत 2 गुणांनी आपले खाते उघडले. रिया मडकईकरने चढाईत 2 गुण टिपत बरोबरी साधली. शिवशक्तीने लोण देत 10-04 अशी आघाडी घेतली, पण ती फार काळ टिकली नाही. शिरोडकरने त्यानंतर पूर्वार्धातच 2 लोण देत 22-13 अशी आघाडी घेतली.
उत्तरार्धात शिवशक्तीची पूजा चढाई करताना स्वयंचित (सेल्फ आऊट) झाली. त्याचवेळी शिरोडकरच्या 3 खेळाडू राखीव क्षेत्रात गेल्यामुळे बाद झाल्या. येथेच सामना त्यांच्या हातून निसटला. याचा फायदा घेत शिवशक्तीने लोणची परतफेड करीत आघाडी 22-25 अशी कमी करत आणली. शिवशक्तीच्या पूजाने बोनस करीत व गुण घेत 29-28 अशी आघाडी घेतली. शिरोडकरच्या मेघाने बोनससह 2 गडी टिपत संघाला पुन्हा आघाडीवर नेले. शेवटची 5 मिनिटे असताना 32-30 अशी शिरोडकरकडे आघाडी होती. शेवटची काही मिनिटे शिल्लक असताना शिवशक्तीने शिरोडकरवर आणखी एक लोण देत 38-32 अशी आघाडी घेतली आणि सामनाही आपल्या नावे केला. तसे पाहिले तर हा सामना मेघा कदम विरुद्ध पूजा यादव असाच झाला. शिवशक्तीकडून पूजाला चढाईत रिया मडकईकरची, तर पकडीत साक्षी रहाटे व साधना विश्वकर्मा यांची उत्तम साथ लाभली. शिरोडकरकडून मेघाला चढाईत कशीश पाटील, तर पकडीत साक्षी सावंत, श्रावणी घाडीगावकर यांची मोलाची साथ लाभली.
विशेष व्यावसायिक गटात भारत पेट्रोलियमने महिंद्राचा चुरशीच्या लढतीत 31-28 असा पराभव करीत स्व. मोहन नाईक चषक व रोख रु. पंचवीस हजार (25,000/-) आपल्या नावे केला.
