महाराष्ट्राच्या बेकायदेशीर मुख्यमंत्र्यांची पीआर टीम प्रचारासाठी इन्फ्लुअन्सर्सशी संपर्क साधत असून हिंमत असेल तर माझ्याबरोबर वन-टू-वन पॉडकास्ट करा, असे आव्हान शिवसेना नेते, युवासेना प्रमुख, आमदार आदित्य ठाकरे यांनी आज एकनाथ शिंदे यांना दिले.
सोशल मीडिया व अन्य क्षेत्रांतील प्रभावशाली व्यक्तींच्या सहवासात राहणे, त्यांना मुलाखती देणे हे सध्या प्रसिद्धीचे माध्यम बनले आहे. मॉडर्न जगात त्यांना इन्फ्लुअन्सर्स असा शब्द वापरला जातो. या इन्फ्लुअन्सर्सना भेटणे आणि विविध यूटय़ूब चॅनेल्सच्या पॉडकास्टला मुलाखती देण्याचा मार्ग सध्या लोकसभा निवडणुकीतील उमेदवारांनी अवलंबला आहे. मुख्यमंत्री शिंदे यांच्या प्रसिद्धी विभागाकडूनही तसा प्रयत्न सुरू असल्याची टीका आदित्य ठाकरे यांनी सोशल मीडियावर केलेल्या पोस्टमध्ये केली आहे.
मुख्यमंत्री शिंदे यांनी स्वतःच्या संधीसाठी शिवसेनेच्या पाठीवर वार केला, असे सांगतानाच शिंदे यांनी पदभार स्वीकारल्यानंतर गुजरातला पाठवलेल्या उद्योगांवर पॉडकास्टमध्ये बोलू या, असे आदित्य ठाकरे यांनी म्हटले आहे. महाराष्ट्रातील तरुणांनी त्यांच्या नोकरीच्या संधी का गमावल्या? राज्यात शेतकऱयांच्या आत्महत्या का वाढत आहेत? शहरी गुन्हेगारी वाढत आहे आणि महिला असुरक्षित आहेत, यावरही बोलू या असे आव्हानच त्यांनी दिले आहे. मात्र या गोष्टींवर न बोलता शिंदे हे निर्लज्जपणे त्यांच्या ठेकेदार मित्रांसाठी आपल्या पदाचा वापर करून महाराष्ट्राला लुटत आहेत, अशी टीकाही आदित्य ठाकरे यांनी केली आहे.
निवडणुकांची रणधुमाळी सुरू असून उद्यापासून पहिल्या टप्प्यातील मतदान पार पडणार आहे, तर दुसरीकडे दुसऱया टप्प्यातील मतदानाकरिता उमेदवारी अर्ज भरण्यासाठीही महाराष्ट्रात जोर आला आहे. याचदरम्यान प्रचारसभाही ठिकठिकाणी गाजत आहेत. त्यामुळे कोण कोणत्या हटक्या पद्धतीने प्रचार करून लोकांपर्यंत सर्वाधिक पोहोचतेय हे पाहावे लागणार आहे.
– आदित्य ठाकरे यांनी एक्सवर ही पोस्ट केली आहे. “महाराष्ट्राच्या बेकायदेशीर मुख्यमंत्र्यांची पीआर टीम इन्फ्लुअन्सर्स आणि पॉडकास्टमध्ये मुख्यमंत्र्यांना होस्ट करण्यास सांगत आहेत, पण मिंधेंना माझे एक आव्हान आहे. त्यांना माझ्यासोबत वन-टू-वन पॉडकास्ट करू द्या, असे आदित्य ठाकरे यांनी नमूद केले आहे.
